ភ្នំពេញ៖ លោកជំទាវ ស៊ិន ណម សមាជិកាក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារ «គ.ក.ស.ក» នៃរដ្ឋបាលខេត្តសៀមរាប ណែនាំដល់មន្ទីរ អង្គភាពពាក់ព័ន្ធទាំងអស់ឱ្យតាមដាន និងដោះស្រាយបញ្ហារបស់ប្រជាពលរដ្ឋដែលត្រឡប់ពីប្រទេសថៃវិញ ពិសេសស្រាវជ្រាវ និងណែនាំអំពីដំណឹងការងារនៅក្នុងស្រុក ដើម្បីមានការងាធ្វើបន្តនៅស្រុកយើង។

ក្នុងកិច្ចប្រជុំសាមញ្ញលើកទី១២ អាណត្តិទី៤ របស់គណៈកម្មាធិការពិគ្រោះយោបល់កិច្ចការស្ត្រី និងកុមារប្រចាំខែមិថុនា និងប្រចាំឆមាសទី១ ឆ្នាំ២០២៥ ដែលមានអ្នកចូលរួមសរុបចំនួន ៣៦រូប កាលពីថ្ងៃទី២៤ ខែមិថុនា ឆ្នាំ២០២៥ លោកជំទាវ ស៊ិន ណម ប្រធានអង្គប្រជុំបានជំរុញឱ្យសមាជិក «គ.ក.ស.ក» ខេត្តទាំងអស់ ត្រូវជំរុញរាល់សកម្មភាពរបស់ខ្លួនឱ្យមានប្រសិទ្ធភាពខ្ពស់ ពិសេសទប់ស្កាត់ និងបង្ក្រាបឱ្យបានរាល់បញ្ហាដែលកើតមានឡើងនៅមូលដ្ឋាន ដោយត្រូវដោះស្រាយឱ្យទាន់ពេលវេលា។

ទន្ទឹមនេះ លោកជំទាវ ស៊ិន ណម ក៏បានអរគុណយ៉ាងជ្រាលជ្រៅចំពោះអង្គការភ្លែងអន្តរជាតិ ដែលបានផ្តល់សៀវភៅណែនាំ ស្តីពីតួនាទី ភារកិច្ច និងរបៀបរបបការងារគណៈកម្មាធិការពិគ្រោះយោបល់កិច្ចការស្ត្រី និងកុមារ របស់ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌចំនួន ១៥០ក្បាល ដល់«គ. ក.ស.ក» ខេត្តផងដែរ។ កិច្ចប្រជុំនេះ ត្រូវបានអង្គប្រជុំពិនិត្យ និងអនុម័តលើរបៀវារៈចំនួន៦ ដើម្បីត្រួតពិនិត្យក្នុងកិច្ចប្រជុំ និងដាក់ទិសដៅបន្តនៅខែបន្ទាប់។ នេះបើតាមការចុះផ្សាយរបស់រដ្ឋបាលខេត្តសៀមរាប នាថ្ងៃទី២៤ ខែមិថុនា ឆ្នាំ២០២៥៕