ភ្នំពេញ៖ Juice jacking គឺសំដៅទៅលើការគំរាមកំហែងសាយប័រ ដែលក្រុមអ្នកវាយប្រហាររៀបចំធ្វើឧបករណ៍ដំឡើងមេរោគ ឬលួចទិន្នន័យក្លែងបន្លំជាឧបករណ៍សាកថ្ម ហើយដាក់ដំឡើងនៅសាធារណៈដើម្បីចម្លងមេរោគ លួចទិន្នន័យពីស្មាតហ្វូននិងឧបករណ៍អេឡិចត្រូនិក របស់ជនរងគ្រោះដែលប្រើប្រាស់វាដើម្បីសាកថ្ម។

វិធីសាស្ត្រនៃការវាយប្រហារ juice jacking កើតឡើងនៅពេលដែលក្រុមអ្នកវាយប្រហារលួចកែប្រែឧបករណ៍សាកថ្មនៅតាមទីសាធារណៈ ដើម្បីដំឡើងកម្មវិធីមេរោគដែលអាចទាញយកទិន្នន័យពីឧបករណ៍ដែលបានភ្ជាប់។ ឧបករណ៍ទាំងនេះ អាចបញ្ចូលមេរោគទៅក្នុងទូរសព្ទឬឧបករណ៍អេឡិចត្រូនិករបស់យើង ដើម្បីលួចយកព័ត៍មានផ្ទាល់ខ្លួន។

ដើម្បីការពារការវាយប្រហារ Juice Jacking កម្ពុជាឆ្ពោះទោកាន់ឌីជីថល បានប្រាប់ពីវិធីសាស្រ្តចំនួន ២គឺ ទី១. ចៀសវាងការប្រើឧបករណ៍សាកថ្មនៅទីសាធារណៈ ដែលអ្នកមិនស្គាល់ឬមិនទុកចិត្ត និងទី២. ត្រូវប្រើប្រាស់តែឧបករណ៍សាកថ្មផ្ទាល់ខ្លួនឬដុំសាកថ្មចល័ត (power bank) ដែលជាកម្មសិទ្ធិរបស់អ្នកផ្ទាល់ដោយអាចឆែក និងជឿជាក់បានថាមិនមានអ្នកណាមកលួចកែប្រែឬដំឡើងកម្មវិធីមេរោគ ដើម្បីលួចទិន្នន័យរបស់អ្នកឡើយ៕