ភ្នំពេញ៖ មាត្រា២២៥ នៃច្បាប់ស្តីពីសារពើពន្ធ បានកំណត់ ១៣ចំណុច ជាអំពើរាំងស្ទះដល់ការអនុវត្តបទប្បញ្ញត្តិស្តីពីពន្ធដារ ដើម្បីដាក់ពិន័យទោសទណ្ឌ ដែលជាវិធានការចាំបាច់មួយ ដើម្បីជំរុញការអនុវត្តកាតព្វកិច្ច និងលើកកម្ពស់អនុលោមភាពសារពើពន្ធ។

បើតាមព្រឹត្តិបត្រព័ត៌មានប្រចាំសប្តាហ៍ លេខៈ១០៩ ដែលចេញផ្សាយដោយអគ្គនាយកដ្ឋានពន្ធដារ ឱ្យដឹងថា ១៣ចំណុចនោះរួមមាន៖ ១. ការមិនបានចុះបញ្ជីនៅរដ្ឋបាលសារពើពន្ធ ស្របតាមការកំណត់របស់ច្បាប់ស្តីពី សារពើពន្ធនិងលិខិតបទដ្ឋានគតិយុត្តពាក់ព័ន្ធផ្សេងៗទៀត, ២. ការមិនបានជូនដំណឹងទៅរដ្ឋបាលសារពើពន្ធអំពីការផ្លាស់ប្តូរព័ត៌មាននៃការចុះបញ្ជី, ៣. ការមិនបានដាក់លិខិតប្រកាសសារពើពន្ធ, ៤. ការមិនបានប្រើប្រាស់ប្រព័ន្ធកត់ត្រាដែលកំណត់ដោយរដ្ឋបាលសារពើពន្ធ និងទី៥. ការមិនបានចេញវិក្កយបត្រ។

ទី៦. ការមិនផ្តល់ព័ត៌មាន ឬមិនបានបញ្ជូនរបាយការណ៍តាមការស្នើសុំ, ៧. ការមិនអនុញ្ញាតឱ្យរដ្ឋបាលសារពើពន្ធធ្វើការពិនិត្យបញ្ជីកាគណនេយ្យឬឯកសារផ្សេងៗ, ៨. ការមិនបានរក្សាបញ្ជីកាគណនេយ្យនិងឯកសារផ្សេងៗទៀត, ៩. ការព្យាយាមរារាំងការកំណត់និងការប្រមូលពន្ធ, ១០. ការកសាងឬផ្តល់នូវកំណត់ត្រា ឯកសារ របាយការណ៍ ឬព័ត៌មានក្លែងបន្លំ, ១១. ការលាក់ទុកឬបំផ្លាញចោលដោយចេតនានូវបញ្ជីកាគណនេយ្យ កំណត់ត្រា ឯកសារ របាយការណ៍ ឬព័ត៌មានផ្សេងៗ, ១២. ការចេញវិក្កយបត្រក្លែងបន្លំ និង១៣. ការមិនអនុញ្ញាតឱ្យរដ្ឋបាលសារពើពន្ធចូលគ្រឹះស្ថានអាជីវកម្មដើម្បីកំណត់និងប្រមូលពន្ធ៕