ភ្នំពេញ៖ ក្រសួងយុត្តិធម៌ ណែនាំពលរដ្ឋឱ្យប្រុងប្រយ័ត្នចំពោះក្រុមតេឡេក្រាម (Telegram Group) ដែលយករូបអគារបណ្ឌិត្យសភាភូមិន្ទយុត្តិធម៌ទៅប្រើប្រាស់។ ការអំពាវនាវនេះ ធ្វើឡើងក្រោយក្រសួងយុត្តិធម៌ បានរកឃើញក្រុមឆបោកបង្កើតក្រុមតេឡេក្រាម ដោយយករូបអគារបណ្ឌិត្យសភាភូមិន្ទយុត្តិធម៌ កាត់ត និងកែឈ្មោះទៅជា «EMPIREGAIN-TRADE.COM» គោលបំណងឆបោកពលរដ្ឋ ក្រោមរូបភាពផ្សេងៗ។

បើតាមការចុះផ្សាយរបស់ក្រសួងយុត្តិធម៌ កាលពីថ្ងៃទី២៧ ខែធ្នូ ឆ្នាំ២០២៣នេះ ក្រុមឆបោកតាមប្រព័ន្ធបច្ចេកវិទ្យានេះឈ្មោះ «CAMBODIA EMPIRE-TRADING Khmer INVESTMENT GROUP CHAT» មានសមាជិកជាង៩ពាន់នាក់ក្នុងក្រុមតេឡេក្រាម។ ក្រុមនេះបង្កើតឡើង ដើម្បីឆបោកពលរដ្ឋដោយណែនាំឱ្យសមាជិកក្នុងក្រុមដាក់ប្រាក់វិនិយោគលើប្រភេទទីផ្សារមូលបត្រ និងភាគហ៊ុនផ្សេងៗទៀត។

ក្នុងករណីនេះ ក្រសួងយុត្តិធម៌ បានអះអាងថា៖«សកម្មភាពដែលកំពុងតែធ្វើឡើងតាមរយៈក្រុមតេឡេក្រាមខាងលើនេះ មិនមានការពាក់ព័ន្ធជាមួយក្រសួងយុត្តិធម៌នោះទេ ហើយក្រសួងយុត្តិធម៌ កំពុងសហការជាមួយក្រសួង-ស្ថាប័នពាក់ព័ន្ធ និងអាជ្ញាធរមានសមត្ថកិច្ច ដើម្បីស្រាវជ្រាវស៊ើបអង្កេត និងចាត់វិធានការតាមផ្លូវច្បាប់ចំពោះឧក្រិដ្ឋជនឆបោកទាំងនោះ»។

ដើម្បីចៀសវាងការចាញ់បោកធ្វើឱ្យខាតបង់ទ្រព្យធនជាយថាហេតុ ក្រសួងយុត្តិធម៌ បានអំពាវនាវដល់សាធារណជនទាំងអស់ បង្កើនការប្រុងប្រយ័ត្នខ្ពស់ចំពោះល្បិចកលឆបោកតាមអនឡាញ និងសូមចាកចេញពីក្រុមតេឡេក្រាមបែបនេះ បើសិនជាបងប្អូនកំពុងស្ថិតនៅ៕