ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងលោកសាស្រ្តាចារ្យបណ្ឌិត Hasan Ali Karasar សកលវិទ្យាធិការ នៃសាកលវិទ្យាល័យ Cappadocia គ្រោងចុះអនុស្សរណៈយោគយល់គ្នា (MOU) ដើម្បីចែករំលែកបទពិសោធ និងការបណ្តុះបណ្តាលវិជ្ជាជីវៈទេសចរណ៍រយៈពេលវែង និងខ្លី។

ក្នុងជំនួបពិភាក្សាការងារ កាលពីថ្ងៃទី២៣ ខែមេសា ឆ្នាំ២០២៥ រវាងឯកឧត្តម ហួត ហាក់ និងលោកសាស្រ្តាចារ្យបណ្ឌិត Hasan Ali Karasar ភាគីទាំងពីរ ក៏បានពិភាក្សាការងារផ្តោតលើការបណ្តុះបណ្តាលវិជ្ជាជីវៈទេសចរណ៍ មានមគ្គុទេសក៏ទេសចរណ៍ បដិសណ្ឋារកិច្ច និងម្ហូបអាហារ ព្រមទាំងចែករំលែកនូវបទពិសោធរៀបចំផែនការយុទ្ធសាស្រ្តអភិវឌ្ឍន៍ទេសចរណ៍ប្រកបដោយនិរន្តរភាព បៃតង បរិយាប័ន្ន ព្រមទាំងទេសចរណ៍ ដែលមានតម្លៃបន្ថែម។

តាមការបញ្ជាក់ពីក្រសួងទេសចរណ៍ លោកសាស្រ្តាចារ្យបណ្ឌិត Hasan Ali Karasar បានដើរតួនាទីយ៉ាងសំខាន់ក្នុងការជួយរៀបចំផែនការទេសចរណ៍ និងគំនិតផ្តួចផ្តើមប្រកបដោយនិរន្តរភាពសម្រាប់ក្រសួងទេសចរណ៍ និងវប្បធម៌តួកគីយ៉េ ព្រមទាំងបណ្តាប្រទេសមួយចំនួនទៀត។ សាកលវិទ្យាល័យ Cappadocia ត្រូវបានចាត់ជាសកលវិទ្យាល័យនាំមុខគេ និងជោគជ័យមួយលើការបណ្តុះបណ្តាលវិជ្ជាជីវៈទេសចរណ៍ជាន់ខ្ពស់ ដូចជាមគ្គុទេសក៏ទេសចរណ៍ បដិសណ្ឋារកិច្ច និងម្ហូបអាហារជាដើម៕