ភ្នំពេញ៖ លោកជំទាវ ផែថងថាន ស៊ីណាវ៉ាត្រ នាយករដ្ឋមន្ត្រីថៃ នឹងមកបំពេញទស្សនកិច្ចផ្លូវការនៅកម្ពុជា នាថ្ងៃទី២៣-២៤ ខែមេសា ឆ្នាំ២០២៥ ដើម្បីពិភាក្សាជាមួយសម្តេចធិបតី ហ៊ុន ម៉ាណែត លើការកំណត់ទិសដៅសកម្មភាពធ្វើឱ្យកាន់តែស៊ីជម្រៅ និងពង្រីកបន្ថែមទៀតនូវកិច្ចសហប្រតិបត្តិការ ដែលផ្តល់ផលប្រយោជន៍ទៅវិញទៅមក។

ក្នុងការបំពេញទស្សនកិច្ចផ្លូវការរយៈពេលពីរថ្ងៃ របស់នាយករដ្ឋមន្ត្រីថៃ និងស្វាមី មកកាន់កម្ពុជានេះ ថ្នាក់ដឹកនាំកម្ពុជា និងថៃ ក៏នឹងធ្វើជាសាក្សីនៅក្នុងពិធីចុះហត្ថលេខាលើឯកសារ ស្តីពីកិច្ចសហប្រតិបត្តិការទ្វេភាគីលើវិស័យមួយចំនួនផងដែរ។ ទស្សនកិច្ចផ្លូវការមកកម្ពុជានេះដែរ គឺតបតាមការអញ្ជើញរបស់សម្តេចធិបតី ហ៊ុន ម៉ាណែត ដោយក្នុងនោះលោកជំទាវ ផែថងថាន ស៊ីណាវ៉ាត្រ និងស្វាមី នឹងមានព្រះរាជសវនាការជាមួយ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រមទាំងជួបសម្តែងការគួរសមដាច់ដោយឡែកជាមួយ សម្តេចតេជោ ហ៊ុន សែន ប្រធានព្រឹទ្ធសភា និងសម្តេចសភាធិការធិបតី យួន សុដារី ប្រធានរដ្ឋសភាផងដែរ។

គួរបញ្ជាក់ថា ការអញ្ជើញមកទស្សនកិច្ចរបស់លោកជំទាវនាយករដ្ឋមន្ត្រីថៃ មកកាន់ប្រទេសកម្ពុជានេះ គឺកើតមានឡើងស្របពេលដែលប្រទេសទាំងពីរ ប្រារព្ធខួបទី៧៥ នៃទំនាក់ទំនងការទូត ដែលនឹងពង្រឹងបន្ថែមទៀតនូវចំណងមិត្តភាពជាប្រពៃណី រវាងប្រជាជនទាំងពីរ។ នេះបើតាមសេចក្តីប្រកាសរបស់ក្រសួងការបរទេស និងកិច្ចសហប្រតិបត្តិការអន្តរជាតិ៕