ភ្នំពេញ៖ ថ្ងៃបុណ្យចូលឆ្នាំខ្មែរ គឺជាពេលវេលាដ៏រីករាយ ដែលប្រជាជនខ្មែរជួបជុំគ្រួសារ និងធ្វើដំណើរទៅកាន់ទីកន្លែងជិតឆ្ងាយ។ ទោះជាយ៉ាងណាក្តី ការធ្វើដំណើរនាឱកាសនេះ គឺតម្រូវឱ្យមានការប្រុងប្រយ័ត្នខ្ពស់ ដូច្នេះដើម្បីឱ្យការធ្វើដំណើរប្រកបដោយសុខសុវត្ថិភាព និងគ្មានកង្វល់ សាធារណជន គួរពិនិត្យ និងអនុវត្តគន្លឹះសំខាន់ៗ ដូចខាងក្រោម៖

១. ពិនិត្យស្ថានភាពយានជំនិះ៖ សុវត្ថិភាពក្នុងការធ្វើដំណើរ គឺជារឿងចាំបាច់ ដូចនេះត្រូវពិនិត្យស្ថានភាពយានជំនិះរបស់លោកអ្នកឱ្យបានត្រឹមត្រូវ ដូចជាហ្វ្រាំង សំបកកង់ និងប្រេងឥន្ធនៈជាដើម ដើម្បីការពារហានិភ័យផ្សេងៗ។ ២. ជ្រើសរើសក្រុមហ៊ុនដែលផ្ដល់ទំនុកចិត្ដខ្ពស់៖ បើសិនលោកអ្នក ជ្រើសរើសរថយន្តសាធារណៈ ត្រូវជ្រើសរើសក្រុមហ៊ុន ដែលអាចជឿទុកចិត្តបាន និងបើសិនអ្នកធ្វើដំណើរពេលយប់ គឺត្រូវបង្កើនការប្រុសប្រយ័ត្នខ្ពស់ ទៅលើសុវត្ថិភាព និងការពារសម្ភារផ្ទាល់ខ្លួនផ្សេងៗ។

៣. ការរៀបចំផែនការផ្លូវធ្វើដំណើរ៖ មុនពេលធ្វើដំណើរ ត្រូវមានពេលសម្រាកឱ្យបានគ្រប់គ្រាន់ ព្រមទាំងចៀសវាងការប្រើប្រាស់គ្រឿងស្រវឹង ដើម្បីចូលរួមកាត់បន្ថយហានិភ័យ នៃគ្រោះថ្នាក់ចរាចរណ៍។ ហានិភ័យ នៃការមិនបានប្រុងប្រយ័ត្ន នឹងអាចធ្វើឱ្យមានគ្រោះថ្នាក់ចរាចរណ៍កើតឡើង ប្រសិនបើលោកអ្នក បើកបរដោយប្រើប្រាស់គ្រឿងស្រវឹង ឬបើកបរដោយខ្វះការប្រុងប្រយ័ត្ន៕