ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លើកទឹកចិត្តម្ចាស់កសិដ្ឋានជំរុញការផ្សព្វផ្សាយពាណិជ្ជកម្ម ដើម្បីលក់នូវផលិតផលវារីវប្បកម្មបានតម្លៃខ្ពស់ និងអាចពិនិត្យលទ្ធភាពពង្រីកការវិនិយោគបន្ថែមដោយផ្តោតទៅលើពូជមានតម្លៃខ្ពស់ក្នុងទីផ្សារ ដែលទទួលបានផលចំណេញសេដ្ឋកិច្ច។

ក្នុងដំណើរទស្សនកិច្ចពិនិត្យការងារវារីវប្បកម្មក្នុងកសិដ្ឋានផលិតកូនត្រី នៅឃុំគំរូ ស្រុកថ្មពួក ខេត្តបន្ទាយមានជ័យរបស់ឯកឧត្តម ឌិត ទីណា លោក ជិន សុជា ម្ចាស់កសិដ្ឋានផលិតកូនត្រី បានស្នើសុំឱ្យរដ្ឋមន្រ្តីកសិកម្ម ផ្តល់មេពូជត្រីកេះ និងត្រីឆ្លាំង សម្រាប់ដំណើរការស្រាវជ្រាវ និងពង្រីកអាជីវកម្មលើការផលិតកូនត្រី ២ប្រភេទនេះ ដែលមានតម្រូវការទីផ្សារល្អ និងមានភាពធន់ខ្ពស់។

ជាមួយគ្នានេះ ឯកឧត្តម ឌិត ទីណា បានណែនាំឱ្យម្ចាស់កសិដ្ឋានសហការជាមួយរដ្ឋបាលជលផល ក្នុងការទទួលបានមេពូជត្រី តាមចំនួនដែលត្រូវការ ចំនេញពេលវេលា និងដោះស្រាយបញ្ហាទឹកសម្រាប់ផលិតកម្មវារីវប្បកម្មផងដែរ។ គួរបញ្ជាក់ថា កសិដ្ឋានផលិតកូនត្រីរូបរបស់លោក ជិន សុជា មានផ្ទៃដីសរុបចំនួន ៤ហិកតា មានស្រះសរុបចំនួន ៤៧ស្រះសម្រាប់ចិញ្ចឹមពូជត្រី ដូចជា៖ ត្រីក្រាញ់ ត្រីអណ្តែង ត្រីរ៉ស់ ត្រីឆ្ពិន ត្រីឆ្លាំង និងត្រីទីឡាបព្យាក្រហម ដែលនៅឆ្នាំក្រោយ កសិដ្ឋានមានគោលបំណងពង្រីកបន្ថែមពូជត្រីចំនួន ៣បន្ថែមទៀត ដូចជា៖ ត្រីតាឱន ត្រីកេះ និងត្រីកន្ធរ៕