ភ្នំពេញ៖ ប្រធានសភាពាណិជ្ជកម្មអាម៉េរិកប្រចាំកម្ពុជា លោក Casey Barnett បានបញ្ជាក់ថា នឹងបន្តទាក់ទាញវិនិយោគិនសហរដ្ឋអាម៉េរិកឱ្យមកវិនិយោគលើវិស័យឌីជីថលនៅកម្ពុជា ដោយលោកបានបង្ហាញការគាំទ្រចំពោះដំណើរការនៃការកែទម្រង់របស់ក្រសួងប្រៃសណីយ៍និងទូរគមនាគមន៍ ព្រមទាំងបន្តកិច្ចសហប្រតិបត្តិការឱ្យកាន់តែល្អប្រសើរបន្ថែមទៀត។

ក្នុងជំនួបជាមួយឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ លោក Casey Barnett ក៏បានសរសើរលើសមិទ្ធផលដែលក្រសួងប្រៃសណីយ៍សម្រេចបានលើវិស័យទូរគមនាគមន៍ វិស័យឌីជីថល បរិវត្តកម្មឌីជីថល ការបណ្តុះបណ្តាលមន្ត្រីរាជការលើជំនាញឌីជីថលចាំបាច់ និងភាពជោគជ័យលើការអភិវឌ្ឍថ្នាលនិងកម្មវិធីរដ្ឋាភិបាលឌីជីល។

ជាមួយគ្នានេះ ឯកឧត្តម ជា វ៉ាន់ដេត ក៏បានលើកឡើងអំពីកំណែទម្រង់វិស័យទូរគមនាគមន៍ ការងារបរិវត្តកម្មរដ្ឋាភិបាលឌីជីថល ការដាក់ឱ្យប្រើប្រាស់ថ្នាលនិងកម្មវិធីរដ្ឋាភិបាលឌីជីថល ការធ្វើកំណែទម្រង់ច្បាប់និងលិខិតបទដ្ឋានគតិយុត្តក្រោមសមត្ថកិច្ចក្រសួង ការរៀបចំបង្កើតសួនបច្ចេកវិទ្យាឌីជីថល និងការបណ្តុះបណ្តាលមន្ត្រីរាជការលើជំនាញឌីជីថលចាំបាច់។ នេះបើតាមការចុះផ្សាយរបស់ក្រសួងប្រៃសណីយ៍ កាលពីថ្ងៃទី២០ ខែមីនា ឆ្នាំ២០២៥៕