ភ្នំពេញ៖ ក្រសួងពាណិជ្ជកម្ម ស្នើសុំឱ្យភាគីចិនជួយផ្សព្វផ្សាយផលិតផលខ្មែរ ទេសចរណ៍ និងពិធីបុណ្យអង្គរសង្រ្កាន្តនាពេលខាងមុខនេះ ព្រមទាំងបានផ្តល់វីដេអូផ្សព្វផ្សាយដល់ភាគីចិនផងដែរ។ នេះជាការស្នើសុំរបស់ឯកឧត្តម លីម ឡោកពិសិដ្ឋ រដ្ឋលេខាធិការក្រសួងពាណិជ្ជកម្ម កាលពីថ្ងៃទី១៤ ខែមីនា ឆ្នាំ២០២៥។

ក្នុងទស្សនៈកិច្ចនៅក្រុមហ៊ុន COFCO Bio-Energy Co. Ltd. និងរោងចក្រផលិត semiconductor របស់ក្រុមហ៊ុន HKC Co., Ltd. លោកស្រីអភិបាលក្រុងប៉ៃហៃ នៃតំបន់ស្វយ័តជនជាតិជាំងក្វាងស៊ី បានលើកឡើងអំពីវឌ្ឍនភាពនៃសួនឧស្សាហកម្មកម្ពុជា-ចិន និងបានស្នើសុំការសម្របសម្រួលពីភាគីកម្ពុជា ដើម្បីជំរុញកិច្ចការនេះឱ្យបានកាន់តែរលូន និងបានចាប់អារម្មណ៍ក្នុងការមកទស្សនកិច្ចនៅកម្ពុជា ដើម្បីស្វែងរកឱកាសធ្វើពាណិជ្ជកម្ម។

ជាមួយគ្នានេះ ឯកឧត្តមរដ្ឋលេខាធិការក្រសួងពាណិជ្ជកម្ម និងគណៈប្រតិភូ ក៏បានទៅកាន់រោងចក្រ ឧស្សាហកម្ម ជាច្រើននៅទីក្រុងហុងកុង ជូហៃ សិនជិន និងហ្វូសាន ដោយបានជួបពិភាក្សាជាមួយបណ្ដាក្រុមហ៊ុនប្រមាណ ១៥០នាក់ ទស្សនារោងចក្រចំនួន ១១ ហើយក្នុងនោះមានក្រុមហ៊ុន និងធុរជនមួយចំនួនបង្ហាញពីចំណាប់អារម្មណ៍ក្នុងការមកធ្វើទស្សនកិច្ចនៅកម្ពុជាដើម្បីស្វែងរកឱកាសធុរកិច្ច និងវិនិយោគនៅកម្ពុជា៕