ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ សម្រេចកែសម្រួលលើមុខងារមួយចំនួន នៃប្រព័ន្ធផ្តល់សេវាសាធារណៈ ក្នុងការស្នើសុំវិញ្ញាបនបត្របង្កើតកសិដ្ឋានចិញ្ចឹមសត្វ ឬបង្កាត់ពូជសត្វ ដើម្បីផ្តល់ភាពងាយស្រួលដល់អ្នកប្រើប្រាស់ អ្នកត្រួតពិនិត្យ និងការទូទាត់ប្រាក់តាមប្រព័ន្ធ ដូចជាការភ្ជាប់នូវ KHQR ជាដើម។

ក្នុងកិច្ចប្រជុំ កាលពីថ្ងៃទី៦ ខែមីនា ឆ្នាំ២០២៥ ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មន្ត្រីជំនាញនៃអគ្គនាយកដ្ឋានសុខភាពសត្វ និងផលិតកម្មសត្វ និងក្រុមការងារសម្របសម្រួលបច្ចេកទេសឌីជីថល នៃការិយាល័យគ្រប់គ្រងកម្មវិធីបច្ចេកវិទ្យាឌីជីថល នៃមជ្ឈមណ្ឌលព័ត៌មាន និងឯកសារកសិកម្ម ក៏បានពិនិត្យលើការកែសម្រួលមាតិកា ខ្លឹមសារ និងរូបរាង នៃគេហទំព័របណ្ណាល័យកសិកម្ម។ ការកែសម្រួលនេះ គឺដើម្បីផ្តល់ភាពងាយស្រួលដល់អ្នកប្រើប្រាស់ក្នុងការងារស្វែងរកឯកសារបច្ចេកទេសកសិកម្ម (សៀវភៅ និងវីដេអូ) ក៏ដូចជាណែនាំដល់ក្រុមការងារក្នុងការប្រមូល និងបញ្ចូលនូវឯកសារកសិកម្មថ្មីៗបន្ថែមទៀតលើគេហទំព័របណ្ណាល័យកសិកម្មនេះឱ្យកាន់តែសម្បូរបែប។

ឯកឧត្តម សៀក ឡេង ក៏បានពិនិត្យ «ប្រព័ន្ធបញ្ជរតែមួយជាតិ» និងឃើញថា ទទួលបានសមិទ្ធិផលល្អ និងមានចំណុចដែលត្រូវយកជាគម្រូតាមសម្រាប់រៀបចំធ្វើប្រព័ន្ធផ្សេងៗបន្ថែមទៀត។ ឱកាសនោះ ឯកឧត្តមអនុរដ្ឋលេធិការក្រសួងកសិកម្ម បានលើកទឹកចិត្ត និងជំរុញឱ្យអង្គភាពជំនាញ និងក្រុមបច្ចេកទេសសហការគ្នាឱ្យបានល្អ ដើម្បីសម្រេចកិច្ចការងារទាំងអស់នេះឱ្យបានកាន់តែល្អប្រសើរបន្ថែមទៀត៕