ភ្នំពេញ៖ កម្ពុជា បានតាំងបង្ហាញផលិតផលស្វាយចន្ទី និងបង្ហាញសក្តានុពលនៃស្វាយចន្ទីកម្ពុជា នៅកម្មវិធីសន្និសីទស្វាយចន្ទីពិភពលោក (World Cashew Conference 2025) ក្នុងទីក្រុងឌូបៃ ប្រទេសអេមីរ៉ាតអារ៉ាប់រួម ដើម្បីលើកកម្ពស់ឱកាសវិនិយោគនៅក្នុងវិស័យស្វាយចន្ទីនៅកម្ពុជា។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២៤ ខែកុម្ភៈ ឆ្នាំ២០២៥។

ក្នុងកម្មវិធីកាលពីថ្ងៃទី២១-២៣ កុម្ភៈ ដែលរៀបចំដោយកម្មវិធីភាពជាដៃគូកម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED)នេះ កម្ពុជា ក៏បានផ្ដល់ជាទីតាំងសម្រាប់កិច្ចពិភាក្សាពាណិជ្ជកម្ម ដល់អ្នកកែច្នៃ, ពាណិជ្ជករ, អ្នកវិនិយោគ និងដៃគូអភិវឌ្ឍន៍នៅក្នុងវិស័យស្វាយចន្ទីជាង ៦៥០នាក់មកពី ៤០ប្រទេសទូទាំងពិភព។

សន្និសីទនេះ មានគោលបំណងដើម្បីពិភាក្សា និងចែករំលែកព័ត៌មានអំពីនិន្នាការទីផ្សារពិភពលោក, ទស្សនវិស័យរយៈពេល ១០ឆ្នាំ(២០២៥-២០៣៥), ការគ្រប់គ្រងផលិតកម្ម, ការកែច្នៃ និងការគាំទ្ររបស់រដ្ឋាភិបាល ដើម្បីអភិវឌ្ឍវិស័យស្វាយចន្ទី។ គួរបញ្ជាក់ថា កម្មវិធីខាងលើ ក៏មានក្រុមហ៊ុនផលិត និងលក់គ្រាប់ស្វាយចន្ទីកម្ពុជាចំនួន ៥ក្រុមហ៊ុនចូលរួមផង មានដូចជា៖ Handcrafted Cashew Nuts Stung Treng (HCST), Khmer Organic Cooperative Co., Ltd, MIRARTH Agri Tech, Welwilling Agriculture Technology and Unique Noble Trading៕