ភ្នំពេញ៖ សមាគមកសិ-ឧស្សាហកម្មសាធារណរដ្ឋកូរ៉េ (K-Agro) បង្ហាញបំណងដាំដុះសាកល្បងកសិផលមួយចំនួននៅកម្ពុជា ដូចជាដំឡូងផ្អែម និងឆៃថាវ ដើម្បីពិនិត្យ និងសិក្សាពីលទ្ធភាពនៃការដាំដុះ ផលិតកម្ម តម្រូវការ និងតម្លៃសេដ្ឋកិច្ចនៃដំណាំនេះ។ នេះជាការលើកឡើងរបស់លោក សុង ដុងអ៊ីល ប្រធានសមាគម K-Agro កាលពីថ្ងៃទី១៩ ខែកុម្ភៈ ឆ្នាំ២០២៥។

ក្នុងជំនួបជាមួយឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក សុង ដុងអ៊ីល បានបន្តថា សមាគម ក៏មានបំណងចង់ស្វែងយល់បន្ថែមពីសក្តានុពលផលិតផលកសិកម្មកម្ពុជា ដែលសំដៅជំរុញកសិ-ពាណិជ្ជកម្មរបស់កម្ពុជាទៅកាន់ទីផ្សារកូរ៉េ និងអន្តរជាតិ។ ជាមួយគ្នានេះ ប្រធានសមាគម K-Agro បានបញ្ជាក់ថា សមាគមបានប្រមូលផ្តុំដោយបណ្តុំក្រុមហ៊ុនជាច្រើនផ្នែកដូចជា ក្រុមហ៊ុនកែច្នៃ ចែកចាយ និងក្រុមហ៊ុនដឹកជញ្ជូន ដែលអាចចងជាសម្ព័ន្ធខ្សែច្រវាក់ផ្គត់ផ្គង់ផលិតផលកសិកម្មពីកម្ពុជាទៅទីផ្សារអន្តរជាតិផងដែរ។

ឯកឧត្តម ប្រាក់ ដាវីដ បានបន្ថែមថា ការមានបំណងវិនិយោគលើវិស័យកសិកម្មរបស់ក្រុមហ៊ុន ពិសេសលើការកែច្នៃកសិផលដែលមានស្រាប់នៅកម្ពុជា នឹងរួមចំណែកលើកស្ទួយវិស័យនេះកាន់តែរីកចម្រើន ស្របពេលដែលកម្ពុជា មានកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសជាច្រើន ដែលនេះនឹងផ្តល់ឱកាសឱ្យវិនិយោគិនកូរ៉េនាំចេញផលិតផលកសិកម្មទៅកាន់ទីផ្សារអន្តរជាតិកាន់តែធំទូលាយ។ ទន្ទឹមនឹងនេះ ឯកឧត្តម ប្រាក់ ដាវីដ បានណែនាំឱ្យសមាគម ព្រមទាំងក្រុមហ៊ុនកូរ៉េ សិក្សាពីទីផ្សារ និងវិភាគតម្លៃសេដ្ឋកិច្ចនៃដំណាំនេះឱ្យច្បាស់លាស់ជាមុន ដើម្បីធានាថានឹងផ្តល់អត្ថប្រយោជន៍ជូនប្រជាកសិករ និងវិនិយោគិន៕