ភ្នំពេញ៖ អភិបាលខេត្ដកែប ឯកឧត្តម សោម ពិសិដ្ឋ បានស្នើដល់ប្រជាពលរដ្ឋ ក៏ដូចជាភ្ញៀវទេសច ដែលមកកម្សាន្ដនៅតាមរម្មណីយដ្ឋាននានាក្នុងខេត្ដកែប ឱ្យយោគយល់ចំពោះតម្លៃទំនិញ, ម្ហូបអាហារ និងជាពិសេសគ្រឿងសមុទ្រ ដែលប្រជានេសាទចុះទៅរកដោយផ្ទាល់។ ឯកឧត្តម សោម ពិសិដ្ឋ បានថ្លែងដោយស្នើសុំយ៉ាងដូច្នេះនៅក្នុងសិក្ខាសាលាជំរុញការអភិវឌ្ឍទេសចរណ៍ ការពង្រឹងគុណភាពសេវាកម្មទេសចរណ៍ និងអបអរសាទរពិធីបុណ្យសមុទ្រលើកទី១០ ជុំទី៣ ឆ្នាំ២០២៣ កាលពីថ្ងៃទី០១ ធ្នូនេះ ដោយបញ្ជាក់ថា អាជីវករដែលលក់ក្នុងតម្លៃខ្ពស់នេះ គឺពួកគាត់ផ្តោលើគុណភាពជាចម្បង និងផ្អែកលើទីផ្សារសេរីផងដែរ។

ឯកឧត្តម សោម ពិសិដ្ឋ បានប្រាប់ដល់ភ្ញៀវទេសច និងប្រជាពលរដ្ឋ មុននឹងសម្រេចចិត្តទិញម្ហូបអាហារនៅទីនោះ អាចសួរនាំអំពីតម្លៃជាមុនសិន មុននឹងសម្រេចចិត្តទិញ កុំអាងស្រែកថាថ្លៃហួសហេតុក្រោយពេលម្ចាស់ហាងចេញវិកាយបត្រជូន ហើយយកទៅបង្ហោះតាមបណ្តាញសង្គម ដែលធ្វើឱ្យមានការយល់ច្រឡំពីសាធារណជន និងខូចមុខមាត់តំបន់ទេសចរណ៍ជាប់មាត់សមុទ្រមួយនេះ។

ឯកឧត្តម សោម ពិសិដ្ឋ អភិបាលខេត្ដកែប ក៏បញ្ជាក់ប្រាប់ទៅក្រុមអាជីវករក្នុងសិក្ខាសាលាដែរថា ការអំពាវនាវនេះ មិនមែនមានន័យថាឱ្យអាជីវកម្មកាន់តែតំឡើងថ្លៃ និងបានចិត្តនោះទេ ពោលគឺត្រូវតែយកចិត្តទុកលើកគុណភាព អនាម័យ និងសោភ័ណភាពលើម្ហូបអាហាររបស់ខ្លួនជាចម្បង។

សូមទស្សនាប្រសាសន៍របស់ឯកឧត្តម សោម ពិសិដ្ឋ អភិបាលខេត្ដកែប ដូចតទៅ៖ https://www.youtube.com/watch?v=tXzIx2r9yoo&ab_channel=SMENews