ភ្នំពេញ៖ ក្របខ័ណ្ឌនៃការអភិវឌ្ឍ និងគ្រប់គ្រងអាជីវកម្មកំពង់ផែទន្លេនៅកម្ពុជា នឹងបង្កើនការប្រើប្រាស់ប្រព័ន្ធដឹកជញ្ជូនផ្លូវទឹក តាមរយៈការធ្វើឱ្យប្រសើរឡើងនូវហេដ្ឋារចនាសម្ព័ន្ធដឹកជញ្ជូនតាមផ្លូវទឹក លើកកម្ពស់ប្រសិទ្ធភាពសេវាកំពង់ផែ ដោយប្រើប្រាស់បច្ចេកវិទ្យាទំនើប និងការកាត់បន្ថយចំណាយឡូជីស្ទីក។ អត្ថប្រយោជន៍ទាំងនេះ នឹងរួមចំណែកទ្រទ្រង់ចីរភាពនៃកំណើនសេដ្ឋកិច្ចកម្ពុជា រយៈពេលវែង និងបង្កើនសមត្ថភាពប្រកួតប្រជែងក្នុងតំបន់ និងសកល។

ដើម្បីសម្រេចគោលបំណងខាងលើ ក្របខ័ណ្ឌនេះ បានដាក់ចេញនូវអភិក្រមមួយចំនួន គឺការកំណត់កំពង់ផែយុទ្ធសាស្ត្ររបស់រដ្ឋ និងការកំណត់សសរស្តម្ភចំនួន៥ រួមមាន៖ ការពង្រឹងក្របខ័ណ្ឌគតិយុត្ត, ការពង្រឹងយន្តការស្ថាប័ន, ការកំណត់អាទិភាពលើយុទ្ធសាស្ត្រវិនិយោគ, ការកំណត់ប្រភពហិរញ្ញប្បទាន និងម៉ូឌែលអភិវឌ្ឍន៍ និងការអនុវត្តបញ្ជីគម្រោង។ ដើម្បីធានាបាននូវប្រសិទ្ធភាពក្នុងការអនុវត្តច្បាប់ និងរៀបចំសណ្តាប់ធ្នាប់អាជីវកម្ម កំពង់ផែទន្លេ «ក្របខ័ណ្ឌ» នេះ ក៏បានកំណត់វិធានការចំពោះមុខ និងវិធានការរយៈពេលមធ្យម និងវែង និងផែនការសកម្មភាពជូនក្រសួងស្ថាប័នជំនាញផងដែរ។

ក្នុងកិច្ចប្រជុំ គ.ស.ហ. ដើម្បីពិនិត្យ និងពិភាក្សាលើវឌ្ឍនភាពនៃការរៀបចំ និងកែសម្រួលសេចក្តីព្រាង «ក្របខ័ណ្ឌនៃ ការអភិវឌ្ឍ និងគ្រប់គ្រងអាជីវកម្មកំពង់ផែទន្លេនៅកម្ពុជា» ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលផ្តល់កិច្ចសហការកែលម្អជាបន្តបន្ទាប់ពីថ្នាក់ដឹកនាំ គ្រប់ក្រសួង ស្ថាប័នពាក់ព័ន្ធ ជាពិសេសគណៈកម្មាធិការអន្តរក្រសួង។ កិច្ចខិតខំទាំងនោះ រួមមាន៖ រៀបចំក្របខ័ណ្ឌអភិវឌ្ឍន៍ និងគ្រប់គ្រងអាជីវកម្មកំពង់ផែទន្លេ និងការតភ្ជាប់បណ្តាញប្រព័ន្ធដឹកជញ្ជូនតាមផ្លូវទន្លេជាមួយផ្លូវសមុទ្រ និងធ្វើសេចក្តីព្រាងនៃឯកសារ «ក្របខ័ណ្ឌ» នេះកាន់តែមានភាពច្បាស់លាស់ និងគ្រប់ជ្រុងជ្រោយ ដើម្បីដាក់ជូនរាជរដ្ឋាភិបាលពិនិត្យ និងអនុម័តនាពេលឆាប់ៗខាងមុខនេះ៕