ភ្នំពេញ៖ រាជរដ្ឋាភិបាល នឹងពង្រីកនិងពង្រឹងប្រសិទ្ធភាព នៃការផ្សព្វផ្សាយ និងការលើកកម្ពស់ការយល់ដឹងអំពីគោលនយោបាយ និងយុទ្ធសាស្ត្ររបស់រាជរដ្ឋាភិបាល ព្រមទាំងអត្ថប្រយោជន៍នៃការឈានចូលក្នុងប្រព័ន្ធ ដល់អ្នកដែលប្រកបមុខរបរក្នុងសេដ្ឋកិច្ចក្រៅប្រព័ន្ធ។

រាជរដ្ឋាភិបាល ក៏នឹងធ្វើសកម្មភាពឱ្យកាន់តែសកម្មបន្ថែមទៀត ក្នុងការទាក់ទាញសហគ្រាស កម្មករ និយោជិត និងបុគ្គលស្វ័យនិយោជន៍ដែលស្ថិតនៅក្នុងក្រុម ឬវិស័យអាទិភាពក្នុងសេដ្ឋកិច្ចក្រៅប្រព័ន្ធឱ្យឈានចូលក្នុងប្រព័ន្ធ តាមរយៈការពង្រឹងការផ្សព្វផ្សាយពីគោលនយោបាយ និងយុទ្ធសាស្រ្តនានារបស់រាជរដ្ឋាភិបាលក្នុងគោលដៅពង្រីក និងពង្រឹងការអភិវឌ្ឍសេដ្ឋកិច្ចក្រៅប្រព័ន្ធឱ្យប្រកបដោយប្រសិទ្ធភាព។

ទន្ទឹមគ្នានេះ រាជរដ្ឋាភិបាល ក៏នឹងលើកកម្ពស់ការចូលរួមរបស់វិស័យឯកជន ដៃគូអភិវឌ្ឍន៍ និងសមាគមឬអង្គការផ្សេងៗ ដែលមានការប្រមូលផ្តុំនិងធ្វើសកម្មភាពផ្ទាល់ច្រើនជាមួយអ្នកប្រកបមុខរបរ និងធ្វើការងារនៅក្នុងសេដ្ឋកិច្ចក្រៅប្រព័ន្ធ ដោយមានការជំរុញ ការរៀបចំសម្ព័ន្ធសេដ្ឋកិច្ចក្រៅប្រព័ន្ធ ដើម្បីលើកកម្ពស់កិច្ចសន្ទនា និងការចូលរួមក្នុងការរៀបចំគោលនយោបាយផ្សេងៗ៕

ប្រភពពីសៀវភៅ«យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨»៖ https://shorturl.at/Rv7PH