ភ្នំពេញ៖ រដ្ឋបាលក្រុងច្បារមន ខេត្តកំពង់ស្ពឺ មិនអនុញ្ញាតឱ្យអាជីវករ លក់ដូរនៅផ្សារមាត់ស្ទឹង និងលក់ដូរមិនមានសណ្តាប់ធ្នាប់លើដីចំណីផ្លូវ និងតាមសំយាបផ្ទះ ជុំវិញបរិវេណផ្សារកំពង់ស្ពឺ និងសួនដើមលាភទៀតឡើយ។ ការសម្រេចបញ្ឈប់ការធ្វើអាជីវកម្មរបស់ពលរដ្ឋនេះ គឺដើម្បីរៀបចំសួនច្បារ ដាំដើមត្នោតសងខាងស្ទឹង និងធ្វើផ្លូវថ្មើរជើង ព្រមទាំងរៀបចំសណ្តាប់ធ្នាប់សាធារណៈផងដែរ។

សេចក្តីជូនដំណឹង របស់រដ្ឋបាលក្រុងច្បារមន បញ្ជាក់ថា រដ្ឋបាលក្រុង បានរៀបចំទីតាំងលក់ដូរមួយកន្លែង ស្ថិតនៅភូមិក្រាំងពលទេព សង្កាត់រការធំ ក្រុងច្បារមន ខេត្តកំពង់ស្ពឺ មិនគិតថវិកាឡើយ សម្រាប់អាជីវករ ដែលមិនមានលទ្ធភាព។

ម្ចាស់អាជីវកម្ម ត្រូវសហការអនុវត្តតាមការណែនាំខាងលើនេះឱ្យមានប្រសិទ្ធភាព ក្នុងរយៈពេល ១០ថ្ងៃ ជាកំហិត ដែលគិតចាប់ពីថ្ងៃទី៣ ខែកុម្ភៈ ឆ្នាំ២០២៥ ដោយក្នុងនោះ ករណីមិនគោរពតាមការណែនាំខាងលើ រដ្ឋបាលក្រុង នឹងអនុវត្តវិធានការដោយមិនទទួលខុសត្រូវរាល់ការខូចខាតសម្ភារ ឬការបាត់បង់ទ្រព្យសម្បត្តិរបស់អាជីវករឡើយ៕