ភ្នំពេញ៖ ទិន្នផលអំបិលដែលផលិតជាមធ្យមប្រចាំឆ្នាំក្នុងខេត្តកំពត បានប្រមានពី ៧-១០ម៉ឺនតោន ក្នុងមួយឆ្នាំ។ នេះបើតាមការលើកឡើងរបស់ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម កាលពីថ្ងៃទី០២ ខែកុម្ភៈ ឆ្នាំ២០២៥។

ក្នុងឱកាស ឯកឧត្តមបណ្ឌិត កៅ ថាច ចុះជួបសហគ្រាស ថូង អ៊ិនធ័រប្រាយស៍ ដែលផលិតនិងកែច្នៃអំបិលធម្មជាតិ និងមានសម្គាល់ភូមិសាស្ត្រទំនិញ GI កំពត-កែប សម្រាប់បម្រើទីផ្សារក្នុងស្រុក និងក្រៅប្រទេស ពិសេសទៅសហគមន៍អ៊ឺរ៉ុប ឯកឧត្តម បានសរសើរលើការផលិត និងកែច្នៃអំបិលប្រកបដោយស្តង់ដាសុវត្ថិភាពដល់អ្នកប្រើប្រាស់។ ជាមួយគ្នានេះ ឯកឧត្តមបណ្ឌិត កៅ ថាច ក៏បានអំពាវនាវដល់ប្រជាពលរដ្ឋ ជួយគំាទ្រផលិតផលអំបិលកំពតផងដែរ។

សូមជម្រាបថា សហគ្រាស ថូង អ៊ិនធ័រប្រាយស៍ កំពុងផលិតអំបិលចំនួន ៣ប្រភេទ គឺអំបិលម៉ត់ អំបិលគ្រូស និងផ្កាអំបិល ដែលត្រូវបានទទួលស្គាល់ដោយប្រព័ន្ធគ្រប់គ្រងសុវត្ថិភាពចំណីអាហារ HACCP និង ប្រព័ន្ធគ្រប់គ្រងគុណភាព ISO9001: 2015 និងមានប្រជាកសិករជាអ្នកផលិតអំបិល ដែលជាសមាជិកប្រមាណ ២០គ្រួសារ៕