ភ្នំពេញ៖ ក្រុមហ៊ុន Nippon Koei Business Partners Co., Ltd. ដែលជាក្រុមហ៊ុនរបស់ជប៉ុន មានបំណងវិនិយោគលើវិស័យស្វាយចន្ទី ដើម្បីនាំចេញ ពិសេសផ្តោតលើការកែច្នៃផ្លែ និងសំបកគ្រាប់ស្វាយចន្ទីទៅជាទឹកខ្មេះ និងប្រេង ចំណែកកាកសំណល់ដែលសេសសល់ នឹងយកទៅធ្វើជាចំណីសត្វគោ។ លោក Tsutomu អគ្គនាយករងក្រុមហ៊ុន Nippon Koei Business Partners លើកឡើងដូច្នេះ កាលពីថ្ងៃទី៣០ ខែមករា ឆ្នាំ២០២៥។

ក្នុងជំនួបជាមួយភាគីក្រុមហ៊ុនខាងលើ ដែលមានបំណងមកសិក្សាស្វែងយល់ពីវិស័យស្វាយចន្ទីនៅកម្ពុជា នៅទីស្តីការក្រុមប្រឹក្សាអភិវឌ្ឍន៍កម្ពុជា ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានលើកទឹកចិត្តឱ្យក្រុមហ៊ុន ឆាប់សម្រេចចិត្តមកបណ្តាក់ទុននៅកម្ពុជា ក្នុងវិស័យស្វាយចន្ទី ពីព្រោះបច្ចុប្បន្ននេះ រាជរដ្ឋាភិបាលកម្ពុជា កំពុងយកចិត្តទុកដាក់លើវិស័យនេះ ពិសេសការកែច្នៃស្វាយចន្ទី។

ឯកឧត្តមអគ្គលេខាធិការ ជា វុទ្ធី ក៏បានលើកឡើងពីសក្តានុពលរបស់វិស័យស្វាយចន្ទីនៅកម្ពុជា ខេត្តសក្តានុពលសម្រាប់ដាំដុះស្វាយចន្ទីនៅកម្ពុជា និងការទាញយកផលប្រយោជន៍ជាអតិបរិមាពីស្វាយចន្ទី ដល់ប្រតិភូ ក្រុមហ៊ុន Nippon Koei Business Partners ផងដែរ៕