ភ្នំពេញ៖ ក្រុមហ៊ុន Evercore Asia បានបង្ហាញបំណងក្នុងការជំរុញកិច្ចសហប្រតិបត្តិការជាមួយកម្ពុជា លើវិស័យថាមពលកកើតឡើងវិញ, វិស័យសុខាភិបាល និងវិស័យទេសចរណ៍។ នេះបើតាមការលើកឡើងរបស់ប្រធានក្រុមហ៊ុន Evercore Asia លោក Keith Magnus ក្នុងជំនួបជាមួយសម្ដេចធិបតី ហ៊ុន ម៉ាណែត កាលពីថ្ងៃទី០៨ ខែមករា ឆ្នាំ២០២៥។

ក្នុងជំនួបនេះ សម្ដេចធិបតី ហ៊ុន ម៉ាណែត មានប្រសាសន៍ឱ្យក្រុមហ៊ុន Evercore Asia ពិចារណាវិនិយោគ វិស័យដែលមានសក្ដានុពលជាច្រើនទៀត ដូចជា៖ វិស័យកសិកម្ម, កម្មន្តសាល, ហិរញ្ញវត្ថុ និងធនាគារ។ ជាមួយគ្នានេះ សម្ដេចធិបតី ហ៊ុន ម៉ាណែត ក៏បានលើកឡើងថា កម្ពុជាបច្ចុប្បន្ន កំពុងប្រើប្រាស់ថាមពលកកើតឡើងវិញចំនួនជាង ៦២% និងបានដាក់គោលដៅឆ្ពោះទៅសម្រេចការប្រើប្រាស់ថាមពលកកើតឡើងវិញឱ្យបាន៧០%នៅឆ្នាំ២០៣០។

ចំពោះ វិស័យសុខាភិបាល សម្តេចធិបតី ហ៊ុន ម៉ាណែត បានបន្តថា កម្ពុជា បានដាក់ចេញគោលនយោបាយគាំទ្រ ដូចជាការពង្រឹងនិងពង្រីក សេវាសុខាភិបាលនៅក្នុងក្របខ័ណ្ឌទូទាំងប្រទេស។ ជាមួយគ្នានេះ សម្ដេចធិបតី ហ៊ុន ម៉ាណែត ក៏បានលើកទឹកចិត្តឱ្យក្រុមហ៊ុនបន្តពិភាក្សាជាមួយក្រសួង-ស្ថាប័ន និងជំរុញការភ្ជាប់ទំនាក់ទំនង និងកិច្ចសហការរវាងវិស័យឯកជននៅក្រៅប្រទេស និងវិស័យឯកជននៅកម្ពុជាផងដែរ៕