ភ្នំពេញ៖ កម្ពុជា និងហ្វីលីពីន ប្តេជ្ញាជំរុញកិច្ចសហប្រតិបត្តិការលើវិស័យសំខាន់ៗ ពិសេសពាណិជ្ជកម្ម និងធុរកិច្ច តាមរយៈទស្សនកិច្ចផ្លូវការរបស់សម្តេចធិបតីនាយករដ្ឋមន្ត្រីទៅហ្វីលីពីននៅឆ្នាំ២០២៥ ដើម្បីជាឱកាសប្រទេសទាំងពីរ អាចពង្រឹងទំនាក់ទំនងទ្វេភាគី និងពង្រីកកិច្ចសហប្រតិបត្តិការបន្ថែមទៀត។

ក្នុងកិច្ចប្រជុំពិភាក្សាការងារ កាលពីថ្ងៃទី១៩ ខែធ្នូ ឆ្នាំ២០២៤ នេះ ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងលោកជំទាវ Flerida Ann Camilie P. Mayo ឯកអគ្គរដ្ឋទូតនៃសាធារណរដ្ឋហ្វីលីន បានលើកឡើងពីការរីចម្រើនចំពោះកិច្ចសហប្រតិបត្តិការទ្វេភាគីប្រទេសទាំងពីរ រួមមានវិស័យពាណិជ្ជកម្ម ទេសចរណ៍ វិនិយោគ និងការតភ្ជាប់ ក៏ដូចជាការដោះស្រាយបញ្ហាឧក្រិដ្ឋកម្មអនឡាញឆ្លងដែនជាដើម។

ឯកឧត្តម ប្រាក់ សុខុន និងលោកជំទាវ Flerida Ann Camilie P. Mayo ក៏ពិភាក្សាពីការតភ្ជាប់ជើងហោះហើរត្រង់ពីទីក្រុងភ្នំពេញ និងទីក្រុងម៉ានីល ដែលអាចរួមចំណែកដល់ការផ្លាស់ប្តូរទេសចរណ៍ ប្រជាជននិងប្រជាជន។ ទន្ទឹមនឹងនេះ ឯកឧត្តម ប្រាក់ សុខុន ជឿជាក់ថា អង្ករកម្ពុជា ដែលនាំចេញទៅហ្វីលីពីន នឹងមានតម្រូវការកាន់តែច្រើនឡើងថែមទៀតផងដែរ។ នេះបើតាមសេចក្តីប្រកាសព័ត៌មានរបស់ក្រសួងការបរទេស ចុះផ្សាយថ្ងៃទី២០ ខែធ្នូ ឆ្នាំ២០២៤៕