ភ្នំពេញ៖ ចាប់ពីថ្ងៃទី១៨-២០ ខែវិច្ឆិកានេះ អាកាសធាតុចុះត្រជាក់នៅក្នុងកម្រិតទាបត្រឹម១៩-២៦ អង្សា ជាមួយនឹងខ្យល់បក់មកពីទិសឦសានពីបង្គួរទៅខ្លាំងក្នុងល្បឿនពី៤-៨ ម៉ែត្រក្នុងមួយវិនាទី នៅតាមតំបន់មួយចំនួនរបស់កម្ពុជា ដោយសារការរងឥទ្ធិពលសម្ពាធខ្ពស់ពីប្រទេសចិន។

ក្រសួងធនធានទឹក និងឧតុនិយម នៅថ្ងៃទី១៨ ខែវិច្ឆិកា ឆ្នាំ២០២៣នេះ បានឱ្យដឹងថា ឥទ្ធិពលសម្ពាធខ្ពស់ពីប្រទេសចិនគ្របដណ្តប់លើប្រទេសកម្ពុជា ជាមួយនឹងខ្យល់មូសុងឦសានបក់ពីបង្គួរទៅខ្លាំង បណ្តាខេត្តមួយចំនួននៅតំបន់វាលទំនាប តំបន់ខ្ពង់រាប និងតំបន់មាត់សមុទ្រ មានធាតុអាកាសចុះត្រជាក់ ចាប់ពីថ្ងៃទី១៨-២០ ខែវិច្ឆិកា។

ស្ថានភាពនៅតំបន់វាលទំនាបនឹងមានខ្យល់ត្រជាក់ពី២២-២៤អង្សា ជាមួយនឹងខ្យល់បក់មកពីទិសឦសានក្នុងល្បឿនពី៥-៧ម៉ែត្រក្នុងមួយវិនាទី។ ចំពោះ តំបន់ខ្ពង់រាប សីតុណ្ហភាពនឹងចុះត្រជាក់ពី១៩ ទៅ២០ និង ២២អង្សា ដោយមានខ្យល់បក់មកពីទិសឦសានក្នុងល្បឿនពី៦-៨ម៉ែត្រក្នុងមួយវិនាទី។ 

ចំណែកនៅតំបន់មាត់សមុទ្រវិញ នឹងចុះត្រជាក់ក្នុងកម្រិតពី២៤-២៦អង្សា ដោយមានខ្យល់បក់មកពីទិសឦសានក្នុងល្បឿនពី៤-៦ម៉ែត្រក្នុងមួយវិនាទី។ អាកាសធាតុនេះ ក៏បណ្តាលឱ្យនៅលើផ្ទៃសមុទ្រមានខ្យល់បក់បោក និងរលកសមុទ្រមានកម្ពស់ពី១,០០-១,៥០ម៉ែត្រផងដែរ។ ទាក់ទងនឹងការអាកាសធាតុចុះត្រជាក់នេះ ឯកឧត្តម គួច ចំរើន អភិបាលខេត្តព្រះសីហនុ នៅព្រឹកថ្ងៃទី១៧ ខែវិច្ឆិកានេះ បានផ្ញើសារណែនាំដោយឱ្យបញ្ឈប់ការធ្វើដំណើរតាមផ្លូវទឹកជាបណ្ដោះអាសន្ន ដោយ បញ្ហាអាកាសធាតុនៅតំបន់សមុទ្រមានខ្យល់បោកបក់ខ្លាំងនៅលើផ្ទៃសមុទ្រ។

ឯកឧត្តមអភិបាលខេត្ត បានអំពាវនាវដល់ថ្នាក់ដឹកនាំខេត្ត កងកម្លាំងប្រដាប់អាវុធទាំងអស់ យកចិត្តទុកដាក់ផ្សព្វផ្សាយព័ត៌មាននេះ ទៅប្រជានេសាទ ភ្ញៀវទេសចរ ឬប្រជាពលរដ្ឋដែលត្រូវធ្វើដំណើរទៅកាន់លំហរសមុទ្រ៕