ភ្នំពេញ៖ កម្ពុជា ទទួលចំណូលពីការលក់សំបុត្រឱ្យភ្ញៀវអន្តរជាតិចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្លៀសបាន ៤១ ៩០៨ ៨៣៣ដុល្លារ ក្នុងរយៈពេល ១១ខែ នៃឆ្នាំ២០២៤។ សេចក្តីប្រកាសព័ត៌មានរបស់គ្រឹះស្ថានអង្គរ នាថ្ងៃទី០១ ខែធ្នូ ឆ្នាំ២០២៤ បញ្ជាក់ថា ចំនួននេះ ទទួលបានការកើនឡើង ២៨,៧៦% ធៀបនឹងរយៈពេលដូចគ្នា ក្នុងឆ្នាំ២០២៣។

គ្រឹះស្ថានអង្គរ បានឱ្យដឹងថា រយៈពេល ១១ខែនេះ កម្ពុជាលក់សំបុត្រឱ្យភ្ញៀវអន្តរជាតិបាន ៨៩៨ ៣៣៩ នាក់ ដែលកើនបាន ២៨,៣៣% បើធៀបនឹងរយៈពេលដូចគ្នា ក្នុងឆ្នាំ២០២៣។ ចំពោះ ការលក់បណ្ណឱ្យភ្ញៀវទេសចរបរទេសចូលទស្សនាប្រាសាទកោះកែរ រយៈពេល១១ខែនេះ មានចំនួន ១៨ ៥៨១នាក់ ស្មើនឹង ២៧៨ ៧១៥ដុល្លារ។ ចំណែក ការលក់សំបុត្រទូកវិញ គ្រឹះស្ថានអង្គរទទួលបានចំណូល ៧០០ ០០៤ដុល្លារ ដែលមានទូកសរុបចំនួន ២៥ ៦៦៨ ក្នុងនោះទូកតូចចំនួន ១៧ ៨៣៩, ទូកកណ្តាលចំនួន ៦ ៨៦៤ និងទូកធំចំនួន ៩៦៤។

គួរបញ្ជាក់ថា ក្នុងខែវិច្ឆិកា ឆ្នាំ២០២៤ ភ្ញៀវបរទេសចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្លៀសមានចំនួន ១២៤ ១៣៦នាក់ កើនឡើង ២៧,៤២% ធៀបនឹងខែវិច្ឆិកា ឆ្នាំ២០២៣ ដែលរកចំណូលបាន ៥ ៩២០ ៨៧២ដុល្លារ កើនឡើងបាន ២៦,៩៤% ធៀបនឹងរយៈពេលដូចគ្នានៃឆ្នាំ២០២៣៕