ភ្នំពេញ៖ កម្ពុជា-ឡាវ នឹងជំរុញលើកកម្ពស់ទំនាក់ទំនងប្រជាជននិងប្រជាជន ការធ្វើពាណិជ្ជកម្ម សេដ្ឋកិច្ច សន្តិសុខ និងទេសចរណ៍របស់ប្រទេសទំាងពីរឱ្យកាន់តែរីកចម្រើនបន្ថែមទៀត ពិសេសការពង្រឹងការតភ្ជាប់គមនាគមន៍រវាងប្រទេសទំាងពីរជាមួយប្រទេសចិនបន្ថែមទៀត។ នេះបើតាមការចុះផ្សាយនៅក្នុងទំព័រហ្វេសប៊ុករបស់សម្តេចរដ្ឋសភាធិបតី ឃួន សុដារី ប្រធានរដ្ឋសភា នាថ្ងៃទី២៥ ខែវិច្ឆិកា ឆ្នាំ២០២៤។

ក្នុងកិច្ចប្រជុំពេញអង្គលើកទី១១ (IPTP-11) នៅសណ្ឋាគារសុខាភ្នំពេញ សម្តេចរដ្ឋសភាធិបតី ឃួន សុដារី និងឯកឧត្តម ខាំបៃ ដំាឡាត់ អនុប្រធានរដ្ឋសភានៃឡាវ បានសន្យាថានឹងខិតខំអនុវត្តអនុស្សរណៈនៃការយោគយល់គ្នារវាងរដ្ឋសភាប្រទេសទំាងពីរ ក្នុងការពង្រឹងកិច្ចសហប្រតិបត្តិការសភាប្រទេសទំាងពីរទំាងក្របខ័ណ្ឌទ្វេភាគីនិងពហុភាគី ដោយយកពលរដ្ឋជាស្នូល។

នាឱកាសនោះ សម្តេចរដ្ឋសភាធិបតី ឃួន សុដារី ក៏បានអបអរពីការរីកចម្រើនរបស់ប្រទេសឡាវ ពិសេសការកសាងផ្លូវគមនាគមន៍រថភ្លើងល្បឿនលឿន ដែលប្រកបដោយសក្តានុពលដល់ការីកចម្រើនខាងសេដ្ឋកិច្ច ដែលធ្វើឱ្យប្រទេសឡាវប្រែក្លាយពីប្រទេសដែលមិនមានការតភ្ជាប់ ទៅជាប្រទេសមានការតភ្ជាប់ (A Landlocked to a Land-linked country)៕