ភ្នំពេញ៖ គម្រោងស្តីពី «មជ្ឈមណ្ឌលគ្រប់គ្រងម៉ាកពាណិជ្ជកម្មជាតិរបស់កម្ពុជា និងការអភិវឌ្ឍប្រព័ន្ធព័ត៌មានអាជីវកម្មកម្មសិទ្ធិបញ្ញា» (NTMC) របស់ទីភ្នាក់ងារសហប្រតិបត្តិការអន្តរជាតិកូរ៉េ (KOICA) នឹងជួយកម្ពុជាពង្រឹងប្រព័ន្ធសេវាឌីជីថលចុះបញ្ជីម៉ាក និងការកសាងកេរ្តិ៍ឈ្មោះម៉ាកសម្រាប់កម្ពុជា។ នេះជាការលើកឡើងរបស់លោកស្រី CHOI Moon Jung នាយិកា KOICA ប្រចាំកម្ពុជា។

ក្នុងពិធីបិទការចុះសិក្សាគម្រោង NTMC នាថ្ងៃទី២២ ខែវិច្ឆិកា ឆ្នាំ២០២៤ លោកស្រី CHOI Moon Jung បានលើកឡើងបន្ថែមថា គម្រោងនេះ នឹងជួយកម្ពុជាលើកកម្ពស់ការចុះបញ្ជីម៉ាក ម៉ាកសម្គាល់ភូមិសាស្ត្រទំនិញកម្ពុជា និងពង្រឹងកិច្ចការពារកម្មសិទ្ធិបញ្ញានៅកម្ពុជា។ ជាមួយគ្នានេះ លោកស្រី CHOI Moon Jung បានអរគុណចំពោះក្រសួងពាណិជ្ជកម្ម ជាពិសេសនាយកដ្ឋានកម្មសិទ្ធិបញ្ញា និងនាយកដ្ឋានពាក់ព័ន្ធ ដែលបានផ្តល់កិច្ចសហការ និងសម្របសម្រួលដល់ជំនាញការរបស់ KOICA ក្នុងការចុះសិក្សាគម្រោងខាងលើ និងការជួបប្រជុំពិភាក្សារវាងជំនាញការកូរ៉េជាមួយក្រសួងស្ថាប័នពាក់ព័ន្ធផងដែរ។

ជាមួយគ្នានេះ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានបន្ថែមថា រាជរដ្ឋាភិបាលកម្ពុជា ជាពិសេសក្រសួងពាណិជ្ជកម្ម បានយកចិត្តទុកដាក់ខ្ពស់ក្នុងការធ្វើទំនើបកម្មប្រព័ន្ធឌីជីថលនានា ដើម្បីឆ្លើយតបទៅនឹងការផ្តល់សេវាសាធារណៈជូនសាធារណជន សំដៅធានាបានការផ្តល់សេវាមានភាពរហ័ស ចំណាយពេលវេលាតិច កាត់បន្ថយចំណាយ និងមានតម្លាភាព៕