ភ្នំពេញ៖ ក្រសួងប្រៃសណីយ៍និងទូរគមនាគមន៍ (ក.ប.ទ.) នឹងរៀបចំ «វេទិកាបញ្ញាសិប្បនិម្មិតកម្ពុជា ឆ្នាំ ២០២៤» ដើម្បីចែករំលែកបទពិសោធ ឧត្តម្មានុវត្តន៍ និន្នាការ គោលនយោបាយ យុទ្ធសាស្ត្រ បញ្ហាប្រឈម និងកាលានុវត្តភាពនៃការចាប់យកបច្ចេកវិទ្យាបញ្ញាសិប្បនិម្មិត (AI)។

វេទិកា ដែលប្រព្រឹត្តទៅនាថ្ងៃទី២៥ ខែវិច្ឆិកា ឆ្នាំ២០២៤ ចាប់ពីម៉ោង ៩:០០នាទីព្រឹក នៅសណ្ឋាគារ ហៃយ៉ាត់ រីជិនស៊ី ភ្នំពេញ នឹងធ្វើឡើងក្រោមប្រធានបទ «ស្វែងយល់អំពីនវានុវត្តន៍បច្ចេកវិទ្យាបញ្ញាសិប្បនិម្មិត និងកាលានុវត្តភាពសម្រាប់កម្ពុជា នាពេលអនាគត»។ វេទិកាបញ្ញាសិប្បនិម្មិតកម្ពុជានេះផងដែរ នឹងរៀបចំឡើងក្រោមអធិបតីភាព ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងមានការចូលរួមពីតំណាងក្រសួង ស្ថាប័ន សហគ្រាស និងក្រុមហ៊ុនឯកជនផងដែរ។

ចំពោះសាធារណជនទូទៅ ដែលចង់ចូលរួមក្នុងវេទិកាខាងលើតាមរយៈប្រព័ន្ធអនឡាញ អាចចុះឈ្មោះតាមរយៈតំណភ្ជាប់ https://go.gov.kh/mptc/ai2024 ចាប់ពីថ្ងៃទី២២ ខែវិច្ឆិកា ឆ្នាំ២០២៤ នេះតទៅ។ នេះបើតាមការចុះផ្សាយរបស់ ក្រសួងប្រៃសណីយ៍និងទូរគមនាគមន៍៕