ភ្នំពេញ៖ កម្ពុជា និងឥណ្ឌូនេស៊ី រីកចម្រើននៃទំនាក់ទំនងក្នុងវិស័យជាច្រើន ដូចជា៖ កសិកម្ម ពាណិជ្ជកម្ម ការផ្លាស់ប្ដូរប្រជាជននិងប្រជាជន និងវិស័យសន្តិសុខនិងការពារជាតិ។ ពាក់ព័ន្ធនឹងវិស័យទាំងនេះ សម្តេចធិបតី ហ៊ុន ម៉ាណែត លើកទឹកចិត្តក្រសួង-ស្ថាប័ននៃប្រទេសទាំងពីរ បន្តធ្វើការជាមួយគ្នា ដើម្បីពង្រឹង និងពង្រីកកិច្ចសហប្រតិបត្តិការថែមទៀត ព្រោះប្រទេសទាំងពីរនៅមានសក្តានុពលច្រើន។

ឯកឧត្តម Muhaimin Iskandar អនុប្រធានអង្គការ IDC-CDI, និងជារដ្ឋមន្ត្រីសម្របសម្រួលនៃការពង្រឹងសហគមន៍នៃប្រទេសឥណ្ឌូនេស៊ី ព្រមទាំងជាប្រធានគណបក្ស PKB របស់ប្រទេសឥណ្ឌូនេស៊ី លើកឡើងថា ឥណ្ឌូ​នេស៊ី និងកម្ពុជា មានទំនាក់ទំនងយូរអង្វែង និងមានកិច្ចសហការក្នុងវិស័យជាច្រើន ព្រមទាំងគូសបញ្ជាក់អំពីសក្ដានុពលជាច្រើន ដែលប្រទេសទាំងពីរអាចបំពេញឱ្យគ្នាទៅវិញទៅមកផងដែរ។ ឯកឧត្តម Muhaimin Iskandar ចាត់ទុកថា សម្ព័ន្ធភាពនៃអរិយធម៌ គឺជាយន្តការដ៏សំខាន់មួយសម្រាប់ការបង្កើនឥទ្ធិពលនៅក្នុងតំបន់ និងពិភពលោក។

គួរបញ្ជាក់ថា បន្ទាប់ពីកិច្ចប្រជុំគណៈគម្មាធិការប្រតិបត្តិអង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI Executive Committee) ដែលធ្វើឡើងនៅខេត្តសៀមរាប កាលពីថ្ងៃទី១៨ ខែវិច្ឆិកា ឆ្នាំ២០២៤ កម្ពុជានឹងរៀបចំកិច្ចប្រជុំពីរទៀត រួមមាន៖ ១.មហាសន្និបាតសន្និសីទអន្តរជាតិនៃបណ្តាគណបក្សនយោបាយនៅអាស៊ី (ICAPP) លើកទី១២ និងកិច្ចប្រជុំពាក់ព័ន្ធ និង២.សម័យប្រជុំពេញអង្គសភាអន្តរជាតិ ដើម្បីភាពអត់ឱន និងសន្តិភាព (IPTP) លើកទី១១ ផងដែរ។ នេះបើតាមការបញ្ជាក់របស់សម្តេចធិបតី ហ៊ុន ម៉ាណែត៕