ភ្នំពេញ៖ សាជីវកម្មធានាឥណទានកម្ពុជា (CGCC) និងសមាគមសហគ្រិនវ័យក្មេងកម្ពុជា (YEAC) នឹងផ្តល់កិច្ចសហការរវាងគ្នា ដើម្បីជំរុញដល់ការទទួលបានហិរញ្ញប្បទានកាន់តែប្រសើរដល់សមាជិក YEAC ។ នេះបើតាមកិច្ចពិភាក្សារបស់ លោក ណូ លីដា អគ្គនាយក CGCC និងឧកញ៉ា ប៉ិច បូឡែន ប្រធាន YEAC កាលពីថ្ងៃទី០១ ខែវិច្ឆិកា ឆ្នាំ២០២៤ ។

ក្រៅពីការជំរុញដល់ការទទួលបានហិរញ្ញប្បទាន ស្ថាប័នទាំងពីរ ក៏បានសិក្សាពីកត្តារាំងស្ទះ និងបញ្ហាប្រឈមដែលម្ចាស់អាជីវកម្ម សហគ្រិន ជួបប្រទះ និងបានលើកឡើងអំពីសកម្មភាព យុទ្ធសាស្ត្រ ដើម្បីផ្តល់ជាដំណោះស្រាយ និងសម្រួលដល់ម្ចាស់អាជីវកម្ម សហគ្រិន តាមរយៈស្ថាប័នទាំងពីរ និងគ្រឹះស្ថានហិរញ្ញវត្ថុ ដែលជាដៃគូរបស់ CGCC ។

ជាមួយគ្នានេះ CGCC និង YEAC នឹងធ្វើការរួមគ្នា រួមមានការរៀបចំវេទិកា និងសិក្ខាសាលាផ្សេងៗអំពីលទ្ធភាពទទួលបានហិរញ្ញប្បទាន ដែលនឹងមានការចូលរួមចែករំលែកដោយ CGCC ដើម្បីលើកកម្ពស់ការយល់ដឹងអំពីការប្រើប្រាស់សេវាធានាឥណទានរបស់ CGCC ឱ្យកាន់តែបានទូលំទូលាយ និងជំរុញការទទួលបានហិរញ្ញប្បទានផ្លូវការប្រកបដោយប្រសិទ្ធភាព៕