ភ្នំពេញ៖ រដ្ឋបាលរាជធានីភ្នំពេញ ឱ្យម្ចាស់អាជីវកម្មផ្អាកការលក់ដូរនៅជុំវិញមណ្ឌលប្រឡង សញ្ញាបត្រមធ្យមសិក្សាទុតិយភូមិទាំង៣១ ជាបណ្តោះអាសន្ន ក្នុងអំឡុងពេលប្រឡងដែលចាប់ពីថ្ងៃទី០៥ ដល់ ០៧ ខែវិច្ឆិកា ឆ្នាំ២០២៣។

យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ កាលពីថ្ងៃទី០៣ វិច្ឆិកាម្សិលមិញ ការផ្អាកជាបណ្តោះអាសន្ននេះ គឺចំពោះអាជីវកម្មថតចម្លងឯកសារ អ៊ីនធឺណែត អាជីវកម្មលក់សម្ភារសិក្សាគ្រប់ប្រភេទ ភោជនីយដ្ឋាន និងអាហារដ្ឋាន ដែលស្ថិតនៅជុំវិញមណ្ឌលប្រឡង។

លើសពីនេះ អាជីវកម្មផ្សេងទៀតដែលស្ថិតនៅជិតមណ្ឌលប្រលង ហាមបង្កសំឡេង ធ្វើឱ្យប៉ះពាល់ដល់ការប្រឡងរបស់បេក្ខជន។ ចំពោះ ការប្រឡងសញ្ញាបត្រមធ្យមសិក្សាទុតិយភូមិ នឹងចាប់ផ្តើមនៅថ្ងៃទី០៦ ដល់ ០៧ ខែវិច្ឆិកា ឆ្នាំ២០២៣៕