ភ្នំពេញ៖ មន្ទីរពេទ្យកុមារអង្គរ ទទួលបានថវិកាសរុបចំនួន ៥,៧ ម៉ឺនដុល្លារ ពីព្រឹត្តិការណ៍ «ជិះកង់ដើម្បីបរិស្ថាន និងសុខភាពកុមារ ឆ្នាំទី១០» ដែលមានអ្នកចូលរួមជិត ១ពាន់នាក់។ នេះបើតាមការចុះផ្សាយរបស់មន្ទីរពេទ្យកុមារអង្គរ នាថ្ងៃទី២៥ ខែកញ្ញា ឆ្នាំ២០២៤។

ពាក់ព័ន្ធនឹងព្រឹត្តិការណ៍នេះ មន្ទីរពេទ្យកុមារអង្គរ និងគណៈកម្មាការជិះកង់កម្ពុជា បានអរគុណដល់ម្ចាស់ឧបត្ថម្ភ អាជ្ញាធរ អ្នកស្ម័គ្រចិត្ត រួមទាំងអ្នកចូលរួមជិះកង់ទាំងអស់ ដែលបានចូលរួមព្រឹត្តិការណ៍មនុស្សធម៌ដ៏ធំមួយនេះ ដែលធ្វើឱ្យប្រព្រឹត្តិទៅដោយភាពរីករាយ និងជោគជ័យ។ ជាមួយគ្នានេះ មន្ទីរពេទ្យកុមារអង្គរ និងគណៈកម្មាការជិះកង់កម្ពុជា សង្ឃឹមថា ប្រជាពលរដ្ឋទាំងអស់ នឹងបន្តចូលរួមព្រឹត្ដិការណ៍នេះនៅឆ្នាំក្រោយៗទៀតផងដែរ។

គួរបញ្ជាក់ថា គណៈកម្មការ ជិះកង់ដើម្បីកម្ពុជា ត្រូវបានបង្កើតឡើងតាំងពីឆ្នាំ២០១៤ ដោយមានតំណាងមកពីក្រុមហ៊ុនខេមបូឌាសាយក្លីង ខូអិលធីឌី, ក្រុមហ៊ុនចាយ៉ា ខេតធើរីង ខូអិលធីឌី, ក្រុមហ៊ុនចាន់រ៉ាអ៊េតវិនឈ័រ, ហាងលក់ឬជួលកង់ អាំង គឹមសាន្ត។ ការបង្កើតគណៈកម្មការ ជិះកង់ដើម្បីកម្ពុជានេះ ក្នុងគោលបំណងរៀបចំព្រឹត្តិការណ៍ជិះកង់ប្រចាំឆ្នាំ ដើម្បីរៃអង្គាសថវិកាទ្រទ្រង់ដល់មន្ទីរពេទ្យកុមារអង្គរ៕