ភ្នំពេញ៖ តំណាងភាគីកម្មករនិយោជិត បានស្នើបន្ថយការដំឡើងប្រាក់ឈ្មួលអប្បបរមាពី ១៤ដុល្លារ មក ១០ដុល្លារ ខណៈតំណាងភាគីនិយោជក បានស្នើដំឡើងតួលេខកំណើនពីចំនួន ១ដុល្លារ ទៅ ២ដុល្លារ លើតួលេខប្រាក់ឈ្មួលបច្ចុប្បន្ន ២០៤ដុល្លារ។ ភាគីទាំងពីរ បានលើកឡើងបែបនេះ ក្នុងកិច្ចប្រជុំលើកទី៣ របស់ក្រុមប្រឹក្សាជាតិប្រាក់ឈ្នួលអប្បបរមានៃក្រសួងការងារ និងបណ្តុះបណ្តាលវិជ្ជាជីវៈ។

កិច្ចប្រជុំលើកទី៣ ដែលពិភាក្សាកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ២០២៥ ភាគីទាំងពីរ បានបន្តពន្យល់គ្នាទៅវិញទៅមកនូវគោលជំហររបស់ខ្លួន ប្រកបដោយវិជ្ជាជីវៈ។ ជាមួយគ្នានេះ តំណាងភាគីរាជរដ្ឋាភិបាល ក៏បានបន្តសម្របសម្រួល និងផ្តល់នូវការពន្យល់បន្ថែមពាក់ព័ន្ធនឹងលក្ខណវិនិច្ឆ័យបែបសង្គម និងសេដ្ឋកិច្ច ដល់តំណាងភាគីកម្មករនិយោជិត និងតំណាងភាគីនិយោជកផងដែរ។

ក្នុងកិច្ចប្រជុំខាងលើ ភាគីទាំងសងខាង បានសម្រេចបន្តកិច្ចពិភាក្សាលក្ខណៈត្រីភាគីបន្តទៀត នៅថ្ងៃទី១២ ខែកញ្ញា ឆ្នាំ២០២៤ នាម៉ោង ១០:០០នាទីព្រឹកបន្តទៀត។ គិតត្រឹមថ្ងៃទី៦ ខែកញ្ញា ឆ្នាំ២០២៤ កិច្ចប្រជុំពិភាក្សាចរចាកំណត់ប្រាក់ឈ្នួលអប្បបរមា សរុបមានចំនួន ៨លើក រួមមានកិច្ចប្រជុំត្រីភាគីចំនួន ៣លើក កិច្ចប្រជុំផ្ទៃក្នុងរបស់តំណាងភាគីកម្មករនិយោជិត ចំនួន ៣លើក និងតំណាងភាគីនិយោជកចំនួន ២លើក៕