ភ្នំពេញ៖ កូរ៉េ គឺជាវិនិយោគិនបរទេសលំដាប់ទីពីរនៅកម្ពុជា ដោយក្នុងនោះជាង ៤០% នៃទុនសរុបរបស់កូរ៉េ ត្រូវបានវិនិយោគក្នុងវិស័យធនាគារ និងហិរញ្ញវត្ថុនៅកម្ពុជា។ នេះជាការលើកឡើងឯកឧត្តមបណ្ឌិត ផាក ជុងវុក (Park Jung-Wook) ឯកអគ្គរដ្ឋទូតកូរ៉េប្រចាំកម្ពុជា ក្នុងគ្រាជួបជាមួយលោកជំទាវបណ្ឌិត ជា សិរី ទេសាភិបាល ធនាគារជាតិ។

ក្រៅពីសមិទ្ធផលនៃការវិនិយោគ ឯកឧត្តមបណ្ឌិត ផាក ជុងវុក ក៏បានស្នើឱ្យធនាគារជាតិបន្តកិច្ចសហប្រតិបត្តិការបន្ថែមទៀត ពិសេសក្នុងវិស័យធនាគារនិងហិរញ្ញវត្ថុ និងសាយប័រ ព្រមទាំងបញ្ជាក់ពីអាទិភាពជំរុញវិនិយោគិនកូរ៉េមកវិនិយោគក្នុងវិស័យហិរញ្ញវត្ថុនៅកម្ពុជា។ ឯកឧត្តមបណ្ឌិត ផាក ជុងវុក បានសរសើរពីភាពរីកចម្រើនយ៉ាងឆាប់រហ័សនៃវិស័យធនាគារនៅកម្ពុជា តាមរយៈការអភិវឌ្ឍប្រព័ន្ធទូទាត់សងប្រាក់តាមការស្កេនឃ្យូអរកូត។

លោកជំទាវបណ្ឌិត ជា សិរី បានអរគុណកូរ៉េដែលផ្តល់កិច្ចសហការល្អនាពេលកន្លងមក ដូចជាការផ្តល់ជំនួយបច្ចេកទេស និងការបណ្តុះបណ្តាលនានា ដើម្បីរួមចំណែកពង្រឹងប្រសិទ្ធភាពនៃការអនុវត្តនយោបាយរូបិយវត្ថុរបស់ធនាគារជាតិ។ ក្នុងជំនួបដដែលនោះ លោកជំទាវ បណ្ឌិត ជា សិរី បានមានប្រសាសន៍ពីកិច្ចសហការរវាងធនាគារជាតិ និងសាជីវកម្មធានារ៉ាបរ៉ងប្រាក់បញ្ញើកូរ៉េ (KDIC) លើកិច្ចការពារប្រាក់បញ្ញើ និងដំណោះស្រាយសម្រាប់ធនាគារជាតិផងដែរ។ ធនាគារជាតិ ចុះផ្សាយកាលពីថ្ងៃទី១៤ ខែសីហា ឆ្នាំ២០២៤ ថា ភាគីទាំងពីរ ប្តេជ្ញាបន្តពង្រឹងកិច្ចសហការទ្វេភាគីឱ្យកាន់តែជិតស្និទ្ធថែមទៀត៕