ភ្នំពេញ៖ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ផ្តល់ជំនួយឥតសំណងចំនួន ៣លានដុល្លារ ដើម្បីចាប់ផ្តើមគម្រោងអភិរក្ស និងថតចម្លងបណ្ណសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ដំណាក់កាលទី២។ នេះបើតាមការចុះផ្សាយរបស់ទីភ្នាក់ងារសហប្រតិបត្តិការអន្តរជាតិកូរ៉េ នាថ្ងៃទី៨ ខែសីហា ឆ្នាំ២០២៤។

កិច្ចព្រមព្រៀងផ្តល់ជំនួយនេះ ត្រូវបានចុះហត្ថលេខាដោយលោកស្រី Moonjung Choi តំណាងប្រចាំប្រទេសនៃទីភ្នាក់ងារ KOICA ប្រចាំកម្ពុជា និងលោក សាដា អ៊ូម៉ា អាទ្បាម (Sardar Umar Alam) តំណាងអង្គការយូណេស្កូប្រចាំកម្ពុជា។ កំណត់ហេតុនៃកិច្ចពិភាក្សានេះ ត្រូវបានចុះហត្ថលេខាដោយលោកស្រី Moonjung Choi និងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅសារមន្ទីរប្រល័យពូជសាសន៍ទួលស្លែង ក្នុងរាជធានីភ្នំពេញ។

គម្រោងអភិរក្ស និងថតចម្លងបណ្ណសារនេះ មានគោលបំណងផ្សព្វផ្សាយតម្លៃនៃបូជនីយដ្ឋាននៃការចងចាំកម្ពុជា(CMS) តាមរយៈការអភិរក្សកំណត់ត្រា និងវឌ្ឍនភាពនៃការថតចម្លងបណ្ណសារ, ការលើកកម្ពស់លក្ខខណ្ឌអភិរក្ស និងបរិស្ថានអ្នកទស្សនាសម្រាប់ការអភិរក្ស, ផ្សព្វផ្សាយការយល់ដឹងអំពីបូជនីយដ្ឋាន តាមរយៈការធ្វើឱ្យប្រសើរឡើងនៃការតាំងពិព័រណ៍ និងកែលម្អការយល់ដឹងអំពីសន្តិភាព តាមរយៈការអប់រំសន្តិភាព។

លោកស្រី Moonjung CHOI បានលើកឡើងថា គម្រោងជំនួយរបស់ KOICA នៅកម្ពុជា ជានិមិត្តរូបនៃការចែករំលែកទុក្ខសោក និងការចែករំលែកបន្ទុករួមគ្នារវាងប្រជាជនកម្ពុជា និងប្រជាជនកូរ៉េ។ គម្រោងនេះ មានគោលបំណងកាត់បន្ថយទុក្ខសោក និងការឈឺចាប់របស់កម្ពុជា រួមទាំងដើរតួជាមូលដ្ឋានគ្រឹះក្នុងការអប់រំមនុស្សជំនាន់ក្រោយអំពីអតីតកាលរបស់កម្ពុជា ដើម្បីការពារប្រទេសពីសោកនាដកម្មស្រដៀងគ្នានាពេលអនាគត៕