ភ្នំពេញ៖ កម្ពុជា ជាប្រទេសមួយក្នុងចំណោមប្រទេសអាស៊ានទាំង១០ ដែលកំពុងលើកកម្ពស់ការចូលរួមសេដ្ឋកិច្ចឌីជីថលសម្រាប់ស្ត្រី នៅក្នុងវិស័យសហគ្រាសធុនមីក្រូ តូច និងមធ្យម (MSMEs) ដើម្បីមានលទ្ធភាពប្រកួតប្រជែងនាពេលអនាគត និងពង្រីកអាជីវកម្មចូលក្នុងទីផ្សារមូលបត្រ។ នេះបើតាមការលើកឡើងរបស់លោក ម៉ុក កិត្យា អគ្គនាយករង នៃអគ្គនាយកដ្ឋានសហគ្រាសធុនតូច និងមធ្យម និងសិប្បកម្ម កាលពីថ្ងៃទី២០-២១ ខែកក្កដា ឆ្នាំ២០២៤។

ការផ្តល់ការបណ្តុះបណ្តាលដល់សហគ្រិនស្រ្តី ដែលធ្វើឡើងតាមរយៈ «វគ្គបណ្តុះបណ្តាលស្តីអំពីការលើកកម្ពស់ការចូលរួមសេដ្ឋកិច្ចឌីជីថលសម្រាប់ស្ត្រី MSMEs ក្នុងតំបន់អាស៊ាន លើកទី៣» នឹងធ្វើឱ្យកម្ពុជាឈានទៅរកការពង្រីកអាជីវកម្មទៅតំបន់អាស៊ានតាមរយៈប្រព័ន្ធអេឡិចត្រូនិក។ នេះជាការលើកឡើងរបស់លោក ម៉ុក កិត្យា ដោយលោកបន្តថា ការបណ្តុះបណ្តាលនេះនឹងរួមចំណែកកសាងសមត្ថភាពក្នុងវិស័យពាណិជ្ជកម្មអេឡិចត្រូនិក និងការយល់ដឹងពីការគ្រប់គ្រងលើការប្រើប្រាស់ប្រព័ន្ធឌីជីថល ឬព័ត៌មានវិទ្យាសម្រាប់អាជីវកម្ម ការរៀបចំផែនការស្រាវជ្រាវ និងការអភិវឌ្ឍប្រព័ន្ធអេកូ-អាជីវកម្មតាមអេឡិចត្រូនិក ដល់សហគ្រិនជាស្ត្រី។ នេះបើតាមការចុះផ្សាយរបស់នាយកដ្ឋានសហគ្រាសធុនតូច និងមធ្យម នាថ្ងៃទី២២ កក្កដា។

វគ្គបណ្តុះបណ្តាលខាងលើ បានផ្តួចផ្តើមឡើងក្រោមកិច្ចសហការរវាងសារណៈរដ្ឋកូរ៉េ និងអាស៊ាន(ឬ ASEAN-ROK) ក្នុងក្របខ័ណ្ឌគណកម្មាធិការសម្របសម្រួលវិស័យ MSMEs និងមធ្យមអាស៊ាន (ឬ ACCMSMEs) និងមានក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាគណៈកម្មាធិការដឹកនាំគម្រោងសម្រាប់ប្រទេសកម្ពុជា។ គួរបញ្ជាក់ថា ក្រសួងឧស្សាហកម្ម នឹងបន្តភារកិច្ចស្នូលសំខាន់ពីរ គឺការដឹកនាំសម្របសម្រួលនិងអនុវត្តគោលនយោបាយរបស់រដ្ឋាភិបាល និងកសាងសមត្ថភាពដល់សហគ្រាសគ្រប់ប្រភេទ រាប់ទាំងការអនុវត្តផែនការគោលនយោបាយសេដ្ឋកិច្ចក្រៅប្រព័ន្ធផងដែរ៕