ភ្នំពេញ៖ និយ័តករមូលបត្រកម្ពុជា (ន.ម.ក.) អំពាវនាវឱ្យសាធារណជន ជាពិសេសអ្នកវិនិយោគក្នុងវិស័យមូលបត្រប្រុងប្រយ័ត្នចំពោះក្លែងឯកសាររបស់ជនទុច្ចរិត ដែលមានបំណងបន្លំបោកប្រាស់ធ្វើឱ្យប៉ះពាល់ដល់ផលប្រយោជន៍ និងខាតបង់ថវិកា។ នេះបើយោងតាមសេចក្តីជូនដំណឹងរបស់ ន.ម.ក. ចេញផ្សាយនាថ្ងៃទី០៤ ខែកក្កដា ឆ្នាំ២០២៤។

និយ័តករមូលបត្រកម្ពុជា បានឱ្យដឹងថា ថ្មីៗនេះ មានជនទុច្ចរិតដែលមានបំណងមិនល្អបានក្លែងឯកសារដោយប្រើប្រាស់និមិត្តសញ្ញា និងនាមករណ៍របស់ ន.ម.ក. ទាំងភាសាខ្មែរ និងអង់គ្លេស ត្រា និងនាមករណ៍របស់គណៈកម្មការមូលបត្រកម្ពុជា ព្រមទាំងហត្ថលេខា និងឈ្មោះរបស់ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ន.ម.ក. និងនិមិត្តសញ្ញារបស់ក្រសួងសេដ្ឋកិច្ចនិងហិរញ្ញវត្ថុ ក្នុងចេតនាបន្លំបោកប្រាស់ ដែលធ្វើឱ្យប៉ះពាល់ដល់ផលប្រយោជន៍របស់សាធារណជន ពិសេសអ្នកវិនិយោគក្នុងវិស័យមូលបត្រ។

ដើម្បីជៀសវាងនូវការខាតបង់ផ្នែកហិរញ្ញវត្ថុជាយថាហេតុ សាធារណជន ត្រូវមានការប្រុងប្រយ័ត្នខ្ពស់ និងចូលរួមសហការផ្ដល់ព័ត៌មានមកនាយកដ្ឋានកិច្ចការគតិយុត្តនៃ ន.ម.ក. តាមរយៈទូរសព្ទលេខ ០២៣ ៨៨៥ ៦១១។ ជាមួយគ្នានេះ ន.ម.ក. បានអំពាវនាវដល់អាជ្ញាធរមានសមត្ថកិច្ចពាក់ព័ន្ធ ស៊ើបអង្កេត និងចាត់វិធានការតាមផ្លូវច្បាប់ជាធរមានលើជនទុច្ចរិតដែលប្រព្រឹត្តអំពើនេះ៕