ភ្នំពេញ៖ រដ្ឋបាលខេត្តប៉ៃលិន បានរៀបចំដាក់ឱ្យដំណើរការរថយន្តក្រុងសម្រាប់ដឹកសិស្ស និងនិស្សិតដែលត្រូវធ្វើដំណើរទៅបន្តការសិក្សានៅតាមវិទ្យាល័យ ឬសាកលវិទ្យាល័យនានា ក្នុងខេត្តបាត់ដំបង ជារៀងរាល់សប្ដាហ៍ដោយឥតគិតថ្លៃ។ នេះបើតាមសេចក្តីជូនដំណឹងរបស់រដ្ឋបាលខេត្តប៉ៃលិន កាលពីថ្ងៃទី១៦ ខែឧសភា ឆ្នាំ២០២៤។

ការធ្វើដំណើរតាមរថយន្តក្រុងដោយឥតគិតថ្លៃនេះ មានទីតាំងដូចជា៖ នៅថ្ងៃសុក្រ ចេញដំណើរពីខេត្តប៉ៃលិន ទៅខេត្តបាត់ដំបង នៅវេលាម៉ោង ៥:៣០នាទីល្ងាច ដែលចំណតរថយន្តនៅសួនច្បារសួនកុមារ ទល់មុខវិមានឯករាជ្យខេត្តប៉ៃលិន និងថ្ងៃអាទិត្យចេញដំណើរពីខេត្តបាត់ដំបង មកខេត្តប៉ៃលិន នៅម៉ោង ៦:០០នាទីល្ងាច ដែលចំណតរថយន្តនៅមុខសាកលវិទ្យាល័យគ្រប់គ្រង និងសេដ្ឋកិច្ច (UME) ខេត្តបាត់ដំបង។

រដ្ឋបាលខេត្តប៉ៃលិន បានរៀបចំការធ្វើដំណើរតាមរថយន្តក្រុងសម្រាប់ដឹកសិស្ស និស្សិតនេះ គឺក្នុងគោលបំណងចូលរួមចំណែកកាត់បន្ថយការលំបាក ការចំណាយ និងកាត់បន្ថយហានិភ័យផ្សេងៗដែលអាចកើតមានឡើងលើសិស្សានុសិស្សដែលត្រូវធ្វើដំណើរទៅមកដោយទោចក្រយាន។ ចំពោះ សាធារណជន និងសិស្ស និស្សិត ដែលមានបំណងចង់ធ្វើដំណើរតាមរថយន្តក្រុងរបស់រដ្ឋបាលខេត្ត អាចទំនាក់ទំនងមកទីចាត់ការរដ្ឋបាល សាលាខេត្តប៉ៃលិន ឬតាមរយៈលេខទូរសព្ទ៖ ០៨៨ ៦៧៨៩ ២៩៥, ០១៦ ៤១៦ ៦៦៨, ០៩៧ ៥៧៩ ៧៨៧៨៕