ភ្នំពេញ៖ ទិដ្ឋភាព ការធ្វើដំណើររបស់ប្រជាពលរដ្ឋ ទៅលេងស្រុកកំណើត ដោយប្រើប្រាស់សេវារថយន្តក្រុង ដោយឥតគិតថ្លៃរបស់រដ្ឋបាលរាជធានីភ្នំពេញ។ ការធ្វើដំណើរនេះ រដ្ឋបាលរាជធានីភ្នំពេញ បានរៀបចំរថយន្តក្រុងចំនួន៤៥៥គ្រឿង ក្នុងនោះ មាន៦០គ្រឿងសម្រាប់ដឹកពលរដ្ឋធ្វើដំណើរនៅភ្នំពេញ និង៣៩៥គ្រឿងទៀត សម្រាប់ដឹកពលរដ្ឋធ្វើដំណើរទៅស្រុកកំណើតតាមបណ្ដាខេត្តនានាទូទាំងប្រទេស និងត្រឡប់មកវិញ។

ដើម្បីសម្រួលដល់ការធ្វើដំណើរ រដ្ឋបាលរាជធានីភ្នំពេញ ក៏បានត្រៀមទឹកបរិសុទ្ធ ដោយឥតគិតថ្លៃនៅក្នុងរថយន្តក្រុងនីមួយៗ តាមគោលដៅចេញដំណើរផងដែរ។ ឆ្លៀតក្នុងឱកាសនេះ រដ្ឋបាលរាជធានីភ្នំពេញ បានអំពាវនាវដល់ម្ចាស់ក្រុមហ៊ុន និងម្ចាស់រថយន្តដឹកជញ្ជូនអ្នកដំណើរ ឱ្យរក្សាតម្លៃដឹកជញ្ជូននៅដដែល នាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ៕