ភ្នំពេញ៖ រយៈពេល២ខែដើមឆ្នាំ២០២៤ កម្ពុជា រកចំណូលបានពីភ្ញៀវទេសចរបរទេស លើការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្លៀសសរុបជាង ១១,២៣លានដុល្លារ កើនឡើង ៥២,០៩% បើធៀបរយៈពេលដូចគ្នាឆ្នាំ២០២៣។ ក្នុងនោះកម្ពុជាទទួលបានភ្ញៀវអន្តរជាតិសរុបជាង ២៣,៥ម៉ឺននាក់ កើនបាន ៥០,២៧% បើធៀបនឹងរយៈពេលដូចគ្នាឆ្នាំ២០២៣។

បើតាមការចុះផ្សាយរបស់គ្រឹះស្ថានអង្គរ កាលពីថ្ងៃទី០១ ខែមីនា ឆ្នាំ២០២៤ បានបញ្ជាក់ថា ចំណូលលក់បណ្ណនៅប្រាសាទកោះកែររយៈពេល ២ខែនេះ កម្ពុជាទទួលបានជាង ៨,៦៩ម៉ឺនដុល្លារ និងទទួលបានចំនួនភ្ញៀវទេសចរបរទេសសរុប ៥ ៧៩៦នាក់។ រីឯ ចំណូលពីការលក់សំបុត្រទូកវិញ កម្ពុជាទទួលបានចំណូលជាង ២០ម៉ឺនដុល្លារ ក្នុងនោះ ទូកតូចមានចំនួន ៤ ០៥៤, ទូកកណ្តាលមានចំនួន ២ ២៤៦ និងទូកធំមានចំនួន ២៩៧។

ចំពោះ ចំណូលឧបត្ថម្ភមូលនិធិ គន្ធបុប្ផាកម្ពុជា ក្នុងរយៈពេល ២ខែនេះ មានទំហំជាង ៤៧ម៉ឺនដុល្លារ។ ជាមួយគ្នានេះ កម្ពុជារកចំណូលបានពីការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្លៀស នៅក្នុងខែកុម្ភៈ ឆ្នាំ២០២៤ បានជាង ៥,៧៣លានដុល្លារ និងទទួលបានភ្ញៀវទេសចរបរទេសសរុប ១២០ ៣១៨នាក់៕