ភ្នំពេញ៖ ប្រជាកសិករ ប្រមាណ ១៥០គ្រួសារ នៅឃុំតាំងក្រសាំង ស្រុកសន្ទុក ខេត្តកំពង់ធំ ដែលមានដីស្រែរាប់ពាន់ហិកតា ចាប់អារម្មណ៍ស្ម័គ្រចិត្តចងក្រងគ្នាជាសហគមន៍កសិកម្មទំនើប។ សមិទ្ធផលនេះ ទទួលបាននាឱកាស ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ ចុះផ្សព្វផ្សាយ និងបកស្រាយពន្យល់លម្អិតពីសហគមន៍កសិកម្មទំនើប។

ឯកឧត្តម ឃឹម ហ្វីណង់ លើកឡើងថា បច្ចុប្បន្ន មានកសិករកាន់តែច្រើន មើលឃើញពីអត្ថប្រយោជន៍នៃសហគមន៍កសិកម្មទំនើប និងសំណូមពរឱ្យក្រុមការងារចុះទៅផ្សព្វផ្សាយ ប៉ុន្តែដើម្បីអាចបំពេញការងារនេះឱ្យបានលឿន និងមានប្រសិទ្ធភាព មន្ត្រីកសិកម្មឃុំ នឹងសម្របសម្រួលប្រមូលគ្នាឱ្យបានច្រើនជាមុនសិន មុននឹងរៀបចំកម្មវិធីជួបជុំគ្នា។

ឯកឧត្តម ឃឹម ហ្វីណង់ សង្ឃឹមថា នឹងអាចមានសហគមន៍កសិកម្មទំនើបថ្មីមួយទៀត សម្រាប់ដំណាំស្រូវនៅក្នុងខេត្តកំពង់ធំ ក្នុងរដូវកាលខាងមុខនេះ។ នេះបើតាមការចុះផ្សាយរបស់ ឯកឧត្តម ឃឹម ហ្វីណង់ នាថ្ងៃទី១ ខែកញ្ញា ឆ្នាំ២០២៥៕