ភ្នំពេញ៖ លោក អេម៉ានូអែល ម៉ាក្រុង ប្រធានាធិបតីបារាំង បានសន្យាផ្តល់កញ្ចប់ថវិកា២០០លានអឺរ៉ូ ដល់ប្រទេសកម្ពុជា សម្រាប់វិស័យបណ្តុះបណ្តាលវិជ្ជាជីវៈ ថាមពល និងប្រព្រឹត្តកម្មទឹកស្អាត។ នេះបើតាមការលើកឡើងរបស់ប្រធានាធិបតីបារាំង ក្នុងសន្និសីទសារព័ត៌មានរួមគ្នារវាង សម្តេចធិបតី ហ៊ុន ម៉ាណែត និងលោក អេម៉ានូអែល ម៉ាក្រុង នៅទីក្រុងប៉ារីស កាលពីថ្ងៃទី១៨ ខែមករា ឆ្នាំ២០២៤។

លោកប្រធានាធិបតីបារាំង បានលើកឡើងថា ទស្សនកិច្ចរបស់សម្តេចធិបតី ហ៊ុន ម៉ាណែត នៅបារាំង គឺជាឱកាសមួយដែលអាចឱ្យកម្ពុជាមានលទ្ធភាពបង្កើតគម្រោងថ្មីៗ និងការផ្លាស់ប្តូរយោបល់ជាមួយក្រុមហ៊ុនជាច្រើននៅបារាំង ពិសេសក្នុងវិស័យថាមពល ដឹកជញ្ជូន និងហេដ្ឋារចនាសម្ព័ន្ធ។ ក្នុងជំនួបនេះ ប្រធានាធិបតីបារាំង បានថ្លែងបន្ថែមអំពីការផ្តល់ជូនមធ្យោបាយ និងជំនាញចាំបាច់នានាដល់កម្ពុជា ក្រោមការជួយជ្រោមជ្រែងពីភ្នាក់ងារអភិវឌ្ឍន៍បារាំង។

ប្រធានាធិបតីបារាំង បានបញ្ជាក់ថា «ក្នុងសប្តាហ៍នេះ បារាំងសន្យាចាយកញ្ចប់ ២០០លានអឺរ៉ូ ក្នុងវិស័យបណ្តុះបណ្តាលវិជ្ជាជីវៈ ថាមពល និងប្រព្រឹត្តកម្មទឹកស្អាតដល់កម្ពុជា»។ ក្នុងឱកាសនោះ សម្តេចធិបតី ហ៊ុន ម៉ាណែត សង្ឃឹមថា ការជួយនិងការជំរុញរបស់រដ្ឋាភិបាលទាំងពីរ នឹងលើកទឹកចិត្តវិស័យឯកជនឱ្យមានទំនាក់ទំនង និងមានការវិនិយោគទៅវិញទៅមកឱ្យបានកាន់តែច្រើន។

គួរបញ្ជាក់ថា ក្នុងវេទិកាធុរកិច្ចរវាងកម្ពុជា-បារាំង សម្តេចធិបតី បានជួបជាមួយក្រុមហ៊ុនជាច្រើន ព្រមទាំងបានជួបជាមួយអ្នកវិនិយោគបារាំង ដែលមានការចាប់អារម្មណ៍វិនិយោគនៅកម្ពុជាផងដែរ។ សម្តេចធិបតី ក៏បានជួបវិនិយោគិនបារាំង ដែលបានធ្វើសកម្មភាពវិនិយោគនៅកម្ពុជារួចមកហើយ ដូចជា ក្រុមហ៊ុន Vinci, TotalEnergies និងក្រុមហ៊ុនជាច្រើនផ្សេងៗទៀត៕