ភ្នំពេញ៖ វិទ្យាស្ថានបច្ចេកទេសឧស្សាហកម្ម (ITI) ត្រៀមដាក់បង្ហាញឧបករណ៍ទំនើប ដែលផលិតដោយស្នាដៃសិស្ស-និស្សិតជាកូនខ្មែរ យ៉ាងហោចចំនួន ៥ប្រភេទ នៅក្នុងឱកាសទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET Day) លើកទី៨ ឆ្នាំ២០២៥ នាថ្ងៃទី១៥-១៦ ខែមិថុនា ឆ្នាំ២០២៥។

ឧបករណ៍ទំនើបទាំងនោះ រួមមានម៉ាស៊ីនផលិតទឹកកក រថយន្តអគ្គិសនីសម្រាប់បូមសំរាម ប្រព័ន្ធស្មាតស៊ីធី ប្រព័ន្ធស្រោចស្រពស្វ័យប្រវត្តិ និងឧបករណ៍សម្ភារសម្រាប់ការបណ្តុះបណ្តាលលើជំនាញឯកទេសកម្ម ជាដើម។ និសិ្សត ម៉ោល ចាន់វិភាវីន ដែលសិក្សាថ្នាក់បរិញ្ញាបត្របច្ចេកទេសជំនាញបរិក្ខារត្រជាក់ ឆ្នាំទី១ នៃវិទ្យាស្ថាន ITI លើកឡើងដូច្នេះថា៖ «ខ្ញុំ ពិតជាចង់ឱ្យដល់ថ្ងៃបង្ហាញស្នាដៃរបស់គាត់ឆាប់ៗមកដល់ ដើម្បីបង្ហាញដល់មហាជន ជាពិសេសសិស្សានុសិស្ស ដែលកំពុងសិក្សានៅថ្នាក់វិទ្យាល័យ ដើម្បីឱ្យពួកគាត់ បានស្វែងយល់បន្ថែមពីជំនាញបរិក្ខារត្រជាក់នេះ»។

និស្សិត ភាវីន បានបន្តថា សម្រាប់ពលរដ្ឋ ដែលស្រលាញ់ជំនាញបច្ចេកទេស គួរតែចូលរួម ទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈនេះ ព្រោះមានស្នាដៃរបស់និស្សិតពីសាលាផ្សេងៗជាច្រើនទៀត ដែលនឹងយកមកដាក់តាំងបង្ហាញឱ្យទស្សនា ព្រមទាំងបានជួបសំណេះសំណាលផ្ទាល់ជាមួយលោកគ្រូអ្នកគ្រូជំនាញទៀតផង។ ទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET Day) លើកទី៨ នឹងធ្វើឡើងក្រោមប្រធានបទ៖ «ការអប់រំបណ្តុះបណ្តាលបច្ចេកទេសនិងវិជ្ជាជីវៈ បង្កើតឱកាសការងារ សាងក្តីសង្ឃឹមដល់យុវជន» នៅមជ្ឈមណ្ឌលសន្និបាត និងពិព័រណ៍កោះពេជ្រ ថ្ងៃទី១៥-១៦ ខែមិថុនា ឆ្នាំ២០២៥៕