ភ្នំពេញ៖ មូលនិធិគន្ធបុប្ផាកម្ពុជា នឹងរៀបចំយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៥ មានរយៈពេល ១ខែ ដែលនឹងចាប់ផ្ដើមពីថ្ងៃទី១ ដល់ថ្ងៃទី៣០ ខែមិថុនា ដើម្បីជំរុញឱ្យសាធារណជន ក៏ដូចជាសប្បុរសជន ចូលរួមបរិច្ចាគថវិការដល់មូលនិធិគន្ធបុប្ផាកម្ពុជា ក្នុងគោលបំណងនាំស្នាមញញឹម ក្ដីសង្ឃឹមដល់កុមារ ព្រមទាំងស្រ្តីមានផ្ទៃពោះ នៅកម្ពុជាដែលជាស្មារតី «ខ្មែរជួយខ្មែរ»។ នេះបើតាមសេចក្តីជូនដំណឹងរបស់មូលនិធិគន្ធបុប្ផាកម្ពុជា ដែលចុះផ្សាយនាថ្ងៃទី១៩ ខែឧសភា ឆ្នាំ២០២៥។

យុទ្ធនាការនៃការចូលរួមបរិច្ចាគថវិការជូនមូលនិធិគន្ធបុប្ផាកម្ពុជានេះ គឺជាគំនិតផ្ដួចផ្ដើមរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយស នៃមូលនិធិគន្ធបុប្ផាកម្ពុជា ដែលរៀបចំឡើងដើម្បីចូលរួមអបអរសាទរទិវាកុមារអន្តរជាតិ ១ មិថុនា។ តាមរយៈយុទ្ធនាការដែលមានរយៈពេលពេញ ១ខែនេះ នឹងបង្កើនសកម្មភាពកាន់តែជិតស្និតជាមួយក្រសួង-ស្ថាប័ន និងរដ្ឋបាលរាជធានី-ខេត្ត ដែលបានបង្កើតគណៈកម្មការទ្រទ្រង់មូលនិធិគន្ធបុប្ផាកម្ពុជា ក៏ដូចជាក្រុមហ៊ុន-សហគ្រាសដែលបានចុះអនុស្សរណៈយោគយល់គ្នា ជាមួយមូលនិធិគន្ធបុប្ផាកម្ពុជា។

មូលនិធិគន្ធបុប្ផាកម្ពុជា ក៏បានអំពាវនាវដល់ក្រសួងស្ថាប័ន ក្រុមហ៊ុនសហគ្រាស គ្រឹះស្ថានហិរញ្ញវត្ថុដៃគូ តារាសម្ដែង និងបុគ្គលមានប្រជាប្រិយទាំងអស់ ចូលរួមផ្សព្វផ្សាយឱ្យកាន់តែទូលំទូលាយ។ ចំពោះ សប្បុរសជន ដែលមានបំណងបរិច្ចាគអាចចូលរួមបរិច្ចាគតាមរយៈគណនីរបស់មូលនិធិគន្ធបុប្ផាកម្ពុជា នៅធនាគារអេស៊ីលីដាលេខ ០០០១-០៣៤១២៧៣៨១៣ សម្រាប់ប្រាក់រៀល និង ០០០១-០៣៤១២៧៣៨២៤ សម្រាប់ប្រាក់ដុល្លារ បន្ថែមលើនេះ សប្បុរសជនក៏អាចចូលរួមបរិច្ចាគតាមរយៈតំណ https://epayment.acledabank.com.kh/wRx1Z4Gzqzi8zMDq/pay ផងដែរ៕