ភ្នំពេញ៖ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជាលើកទឹកចិត្តឱ្យក្រុមហ៊ុន Yazaki គិតគូរជ្រើសរើសទីតាំងសម្រាប់ការពង្រីកអាជីវកម្មរបស់ខ្លួន និងបង្កើតតំបន់សេដ្ឋកិច្ចពិសេសមួយ ដើម្បីជួយទាក់ទាញវិនិយោគិនជប៉ុន មកបណ្តាក់ទុនវិនិយោគនៅកម្ពុជាបន្ថែមទៀត។

ក្នុងជំនួបពិភាក្សាការងារ កាលពីថ្ងៃទី១២ ខែឧសភា ឆ្នាំ២០២៥ ជាមួយលោក Yoshimoto Ito អគ្គនាយករងក្រុមហ៊ុន Yazaki ឯកឧត្តម ជា វុទ្ធី បានបង្ហាញនូវការស្វាគមន៍ចំពោះការវិនិយោគរបស់ក្រុមហ៊ុន និងបំណងពង្រីកការវិនិយោគបន្ថែមទៀតរបស់ក្រុមហ៊ុននៅកម្ពុជា។ ជាមួយគ្នានេះ លោក Yoshimoto Ito បានថ្លែងអំណរគុណដល់ ឯកឧត្តម ជា វុទ្ធី ដែលបានបង្ហាញនូវការគាំទ្រគម្រោងពង្រីកការវិនិយោគរបស់ក្រុមហ៊ុនបន្ថែមផងដែរ។

គួរបញ្ជាក់ថា ក្រុមហ៊ុន Yazaki មានវត្តមាននៅខេត្តក្វាងតុង សាធារណរដ្ឋប្រជាមានិតចិនប្រមាណ ៤០ឆ្នាំមកហើយ និងបានបណ្តាក់ទុនវិនិយោគបង្កើតរោងចក្រផលិតគ្រឿងបង្គុំខ្សែភ្លើងនៅកម្ពុជា ក្នុងតំបន់សេដ្ឋកិច្ចនាងកុក ខេត្តកោះកុង ប្រមាណជាង ១០ឆ្នាំ។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍកម្ពុជា នាថ្ងៃទី១២ ខែឧសភា ឆ្នាំ២០២៥៕