ភ្នំពេញ៖ សាធារណរដ្ឋឥស្លាមអ៊ីរ៉ង់ បង្ហាញចំណាប់អារម្មណ៍ក្នុងការនាំយកកសិផលកម្ពុជាទៅកាន់ទីផ្សារអ៊ីរ៉ង់ ដែលត្រូវទាមទារចាំបាច់នូវគុណភាពខ្ពស់ មានអនាម័យ និងជាផលិតផលស្តង់ដា ហាឡាល់(Halal)។ នេះជាការលើកឡើងរបស់ឯកឧត្តម អាលី អាកបារ ណាហ្សារី (Ali Akbar Nazari) ឯកអគ្គរដ្ឋទូតនៃសាធារណរដ្ឋឥស្លាមអ៊ីរ៉ង់ប្រចាំនៅកម្ពុជា កាលពីថ្ងៃទី០២ ខែឧសភា ឆ្នាំ២០២៥។

ក្នុងជំនួបនេះ ឯកឧត្តម អ៊ឹម ស៊ីថុល រដ្ឋលេខាធិការប្រចាំការក្រសួងកសិកម្ម រុក្ខាប្រមាញ់ និងនេសាទ បានលើកថា កម្ពុជា មានកសិផលសក្កានុពលជាច្រើនរួមមាន៖ អង្ករ ម្រេច និងស្វាយចន្ទី ដែលភាគីអ៊ីរ៉ង់ អាចពិនិត្យលទ្ធភាពនាំយកទៅកាន់ទីផ្សារអ៊ីរ៉ង់ ដែលមានគុណភាពខ្ពស់ និងរសជាតិឆ្ងាញ់។ ជាមួយគ្នានេះ ឯកឧត្តម អ៊ឹម ស៊ីថុល ក៏បានបញ្ជាក់ពី ការបន្តពង្រឹងកិច្ចសហប្រតិបត្តិការរវាងកម្ពុជា-អ៊ីរ៉ង់ ក្នុងវិស័យកសិកម្មឱ្យកាន់តែជិតស្និត និងរឹងមាំបន្ថែមទៀត។

លើសពីនេះ ភាគីទាំងពីរ បានឯកភាពជំរុញការចុះអនុស្សរណៈនៃការយោគយល់គ្នា(MoU) ទាំងការងារសុខភាពសត្វ និងកិច្ចសហប្រតិបត្តិការក្នុងវិស័យកសិកម្មឱ្យកាន់តែរហ័ស មានភាពពេញលេញ និងគ្រប់ជ្រុងជ្រោយ។ ឯកឧត្តម អ៊ឹម ស៊ីថុល សង្ឃឹមថា ការចុះអនុស្សរណៈនៃការយោគយល់គ្នា(MoU)នេះ នឹងមានភាពបុរេសកម្ម និងផ្តល់ផលចំនេញទាំងអស់គ្នា៕