ភ្នំពេញ៖ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា គ្រាប់ស្វាយចន្ទី ដែលប្រមូលទិញក្នុងខេត្តប៉ៃលិន បាត់ដំបង ពោធិ៍សាត់ និងខេត្តបន្ទាយមានជ័យ នឹងរៀបចំលក់បន្តទៅខេត្តកំពង់ចាម និងប្រទេសវៀតណាម។ នេះបើតាមការចុះផ្សាយរបស់ក្រសួងកសិកម្ម កាលពីថ្ងៃទី២៧ ខែមេសា ឆ្នាំ២០២៥។

ក្នុងឱកាសពិនិត្យសក្តានុពល និងពិគ្រោះយោបល់ ដើម្បីផ្សព្វផ្សាយពីការបង្កើតសហគមន៍កសិកម្មទំនើបស្វាយចន្ទី នៅខេត្តប៉ៃលិន កាលពីថ្ងៃទី២៥ ខែមេសា ឆ្នាំ២០២៥ ជាមួយលោក អ៊ឹម សុភឿន អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន ឯកឧត្តមអនុរដ្ឋលេខាធិការ គី ច័ន្ទរំដួល បានជួបជាមួយអាជីវករប្រមូលទិញគ្រាប់ស្វាយចន្ទីចំនួន ២កន្លែង ស្ថិតនៅសង្កាត់អូតាវ៉ៅ ក្រុងប៉ៃលិន ខេត្តប៉ៃលិន។

ទន្ទឹមនេះ ឯកឧត្តម គី ច័ន្ទរំដួល ក៏បានស្នើឱ្យអ្នកប្រមូលទិញគ្រាប់ស្វាយចន្ទីទាំងអស់ ជួយផ្សព្វផ្សាយបន្តអំពីអត្ថប្រយោជន៍ នៃការចងក្រងសហគមន៍ទំនើបដំណាំស្វាយចន្ទីដល់កសិករ ដែលដាំដុះដំណាំស្វាយចន្ទីផងដែរ។ តាមការលើកឡើងរបស់ ឯកឧត្តម គី ច័ន្ទរំដួល អាជីវករ បានប្រមូលទិញគ្រាប់ស្វាយចន្ទីចំនួន ៤៥០-៥០០តោន ក្នុងមួយថ្ងៃ ដោយតម្លៃគ្រាប់សើម ៥៥៥០៛ ក្នុងមួយគីឡូក្រាម ហើយចន្ទីនៅប៉ៃលិននេះ មានគុណភាណល្អ អត្រាសាច់ ២៧%-៣០% និងមានចំនួន ១០៥-១១០គ្រាប់ក្នុងមួយគីឡូក្រាម៕