ភ្នំពេញ៖ ក្រុមហ៊ុន Kimou Environmental Holding Limited ដែលចុះបញ្ជីភាគហ៊ុននៅទីក្រុងហុងកុង និងមានបទពិសោធអភិវឌ្ឍន៍សួនឧស្សាហកម្មធំៗ យកចិត្តទុកដាក់ខ្ពស់លើដំណោះស្រាយបរិស្ថាន ចាប់អារម្មណ៍ស្វែងរកឱកាសវិនិយោគនៅកម្ពុជា។ នេះបើតាមប្រសាសន៍ លោក Zhang Lianghong ប្រធានក្រុមប្រឹក្សាភិបាល និងជានាយកប្រតិបត្តិ ក្រុមហ៊ុន Kimou Environmental Holding Limited។

ពាក់ព័ន្ធនឹងការចង់វិនិយោគនៅកម្ពុជា នេះ សម្តេចធិបតី ហ៊ុន ម៉ាណែត លើកទឹកចិត្តដល់ក្រុមហ៊ុនខាងលើ ឱ្យពិនិត្យលទ្ធភាពវិនិយោគលើផ្នែកខ្សែច្រវាក់ផ្គត់ផ្គង់ ដើម្បីចូលរួមជាមួយរាជរដ្ឋាភិបាលបង្កើនតម្លៃបន្ថែម និងលើកកម្ពស់សមត្ថភាពប្រកួតប្រជែងរបស់កម្ពុជា។ លើសពីនេះ សម្តេចធិបតីនាយករដ្ឋមន្រ្តី ក៏បានជំរុញឱ្យក្រុមហ៊ុនបន្តពិភាក្សាជាមួយក្រសួង ស្ថាប័នពាក់ព័ន្ធនៃរាជរដ្ឋាភិបាលកម្ពុជា ដើម្បីស្វែងយល់បន្ថែមអំពីឱកាសវិនិយោគនៅកម្ពុជា។

ក្នុងជំនួប ដែលធ្វើឡើង កាលពីថ្ងៃទី៩ ខែមេសា ឆ្នាំ២០២៥ សម្តេចធិបតី ហ៊ុន ម៉ាណែត បានគូសបញ្ជាក់អំពីការយកចិត្តទុកដាក់របស់រាជរដ្ឋាភិបាល ដែលផ្តោតលើអាទិភាពជំរុញការអភិវឌ្ឍប្រកបដោយចីរភាព ដោយផ្ដោតលើការការពារបរិស្ថាន និងលើកកម្ពស់ជីវភាពរស់នៅរបស់ពលរដ្ឋ។ សម្តេចធិបតីនាយករដ្ឋមន្រ្តី ក៏បានបង្ហាញអំពីការដាក់ចេញនូវគោលនយោបាយ យន្តការ និងការលើកទឹកចិត្តផ្សេងៗ សម្រាប់វិនិយោគិនបរទេស ជាពិសេសការវិនិយោគលើផ្នែកខ្សែច្រវាក់ផលិតកម្មផងដែរ៕