ភ្នំពេញ៖ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ស្នើដល់ភាគីចិនចូលរួមកិច្ចសហប្រតិបត្តិការច្រករបៀងមច្ឆា និងអង្គរ បង្កើននូវការវិនិយោគដោយផ្តោតលើការផលិតចំណីសត្វ និងផលិតវ៉ាក់សាំងសម្រាប់សត្វ ពិសេសស្នើឱ្យបន្ថែមនូវគម្រោងសំខាន់ៗពាក់ព័ន្ធនឹងការកែច្នៃកសិផលមួយចំនួន ដូចជា កៅស៊ូ ស្វាយចន្ទី និងស្វាយ ទៅក្នុងក្របខ័ណ្ឌច្រករបៀងមច្ឆា និងអង្ករផងដែរ។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ។

ក្នុងជំនួបពិភាក្សាលើបញ្ជីគម្រោងអាទិភាពដែលភាគីទាំងពីរមានបំណងអនុវត្តក្នុងក្របខ័ណ្ឌច្រករបៀងមច្ឆា និងអង្ករ ជាមួយឯកឧត្តម ប្រាក់ ដាវីដ កាលពីថ្ងៃទី១៨ ខែមីនា ឆ្នាំ២០២៥ លោក Jin Ke អគ្គនាយកនៃមជ្ឈមណ្ឌលកិច្ចសហប្រតិបត្តិការសេដ្ឋកិច្ចអន្តរជាតិ (FECC) បានបញ្ជាក់ថា ភាគីចិនបានទទួលយកសំណើរបស់ភាគីកម្ពុជា ដោយសន្យាថា នឹងព្យាយាមកៀរគរវិនិយោគិនចិនមកពិនិត្យលើកាលានុវត្តភាពក្នុងវិស័យកសិកម្មសំខាន់ៗរបស់កម្ពុជា។

ក្នុងជំនួបរវាងកម្ពុជា និងចិនខាងលើនេះ បានពិភាក្សាលើបញ្ជីគម្រោងអាទិភាពដែលភាគីទាំងពីរមានបំណងអនុវត្តក្នុងក្របខ័ណ្ឌច្រករបៀងមច្ឆា និងអង្ករ ដែលក្នុងនោះរួមមាន គម្រោងវិនិយោគ គម្រោងកិច្ចសហការជំនួយបច្ចេកទេស និងគម្រោងកសាងសមត្ថភាព៕