ភ្នំពេញ៖ រយៈពេលពេញមួយខែកុម្ភៈ ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគសរុបចំនួន ៤៤គម្រោង ដែលមានទុនវិនិយោគប្រមាណ ៣២១លានដុល្លារអាម៉េរិក និងអាចបង្កើតការងារបានប្រមាណ ២៥ពាន់កន្លែង។ ក្នុងចំណោមគម្រោងវិនិយោគទាំងអស់នេះ មានគម្រោងវិនិយោគនៅក្រៅតំបន់សេដ្ឋកិច្ចពិសេសចំនួន ២១គម្រោង និងគម្រោងវិនិយោគនៅក្នុងតំបន់សេដ្ឋកិច្ចពិសេសចំនួន ២៣គម្រោង។

CDC ឱ្យដឹងថា ការអនុម័តគម្រោងវិនិយោគក្នុងខែកុម្ភៈនេះ មានការកើនឡើងចំនួន ៧គម្រោង ធៀបនឹងរយៈពេលដូចគ្នា ក្នុងឆ្នាំ២០២៤។ ទន្ទឹមនឹងនេះ ក្នុងរយៈពេល ២ខែ ដើមឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា ក៏បានអនុម័តគម្រោងវិនិយោគចំនួន ១១២គម្រោង ក្នុងទុនវិនិយោគប្រមាណ ១ប៊ីលានដុល្លារអាម៉េរិក ដោយអាចបង្កើតការងារបានចំនួនជាង ៧ម៉ឺនកន្លែង ដោយចំនួនគម្រោងនេះ កើនឡើងរហូតដល់ទៅ ៤៣គម្រោង បើប្រៀបធៀបនឹងរយៈពេលដូចគ្នា ក្នុងឆ្នាំ២០២៤។

យោងតាមក្រុមប្រឹក្សាអភិវឌ្ឍន៍កម្ពុជា គម្រោងវិនិយោគទាំង ៤៤នោះ ត្រូវបានវិនិយោគក្នុងរាជធានីខេត្ត ចំនួន៩ ដូចជារាជធានីភ្នំពេញចំនួន ៦គម្រោង, ស្វាយរៀង ១១គម្រោង, កណ្តាល ៣គម្រោង, តាកែវ ៣គម្រោង, កំពត ១គម្រោង, ព្រះសីហនុ ៤គម្រោង, កោះកុង ៦គម្រោង, កំពង់ស្ពឺ ៨គម្រោង និងខេត្តកំពង់ឆ្នាំចំនួន ២គម្រោង។ ចំពោះប្រភពទុនវិនិយោគឈានមុខ គឺមកពី ៤ប្រទេស មានប្រទេសចិន ចំនួន៨៦,៧៥%, សិង្ហបុរិ ១១,៩៧% អូស្រ្តាលី ០,៨០% និងអង់គ្លេស ០,៤៨%៕