ភ្នំពេញ៖ វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា នៃក្រសួងកសិកម្ម រុក្ខាប្រមាញ់ និងនេសាទ និងវិទ្យាស្ថានស្រាវជ្រាវធញ្ញជាតិ នៃក្រសួងកសិកម្មគុយបា ចុះអនុស្សរណៈនៃការយោគយល់គ្នា(MoU) លើកិច្ចសហប្រតិបត្តិការពិសោធន៍វាយតម្លៃភាពសមស្រប នៃប្រភេទពូជស្រូវរបស់កម្ពុជា ដែលមានអាយុកាលខ្លី ដើម្បីយកទៅដាំដុះនៅគុយបា។

យោងតាមការចុះផ្សាយរបស់ក្រសួងកសិកម្ម នាថ្ងៃទី៦ ខែមីនា ឆ្នាំ២០២៥ អនុស្សរណៈនៃការយោគយល់គ្នាខាងលើនេះ មានការចូលរួមពី ឯកឧត្តម អ៊ឹម ស៊ីថុល រដ្ឋលេខាធិការប្រចាំការក្រសួងកសិកម្ម រុក្ខាប្រមាញ់ និងនេសាទ និងលោកជំទាវ Milena Caridad Zaldivar Piedra ឯកអគ្គរាជទូតវិសាមញ្ញនិងពេញសមត្ថភាពនៃសាធារណរដ្ឋគុយបាប្រចាំកម្ពុជា៕