ភ្នំពេញ៖ ឯកឧត្តមរដ្ឋមន្ត្រី ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ការប្រមូលគ្នាចងក្រងជាសហគមន៍កសិកម្មទំនើបធំមួយឱ្យកើតមានឡើងរបស់កសិករ គឺដំណោះស្រាយរយៈពេលមធ្យមមួយ ដែលធ្វើឱ្យក្រសួង ក៏ដូចជាប្រជាកសិករអាចគ្រប់គ្រងបានទាំងបរិមាណ គុណភាព ថ្លៃ និងបញ្ហាកង្វះដើមទុន។

ឯកឧត្តមរដ្ឋមន្ត្រី ឌិត ទីណា ពន្យល់ថា នៅពេលកសិករប្រមូលផ្តុំគ្នាជាសហគមន៍ ខាងផ្នែកឥណទានអាចផ្តល់ប្រាក់កម្ចីច្រើន ដើម្បីផលិត ខុសពីការធ្វើកសិកម្មរៀងខ្លួន ដែលមានភាពស្មុគស្មាញក្នុងផ្នែកហិរញ្ញវត្ថុ។ ក្នុងសន្និសីទសារព័ត៌មាន ស្តីពី «ស្ថានភាពថ្លៃស្រូវ និងការប្រមូលផលស្រូវប្រាំង» កាលពីថ្ងៃទី១៥ ខែមករា ឆ្នាំ២០២៥ ឯកឧត្តមរដ្ឋមន្ត្រីកសិកម្ម បញ្ជាក់ថា ការចូលរួមសហគមន៍ទំនើប ក៏នឹងជួយដល់កសិកររយៈពេលវែងផងដែរ តាមរយៈការកាត់បន្ថយថ្លៃដើមផលិត ដោយសហគមន៍អាចវិនិយោគធ្វើជីធម្មជាតិដោយខ្លួនឯងបានជាដើម៕